Familja e Avicii-t, DJ-it të njohur suedez, ka publikuar një deklaratë lidhur me vdekjen e papritur të artistit në moshën 28-vjeçare. Ende nuk ka një deklaratë zyrtare për shkaqet e vdekjes së ikonës së muzikës elektronike, emri i vërtetë i së cilit ishte Tim Bergling.
Nga ana tjetër fjalët e familjarëve lënë shumë dyshime: “Tim nuk mund të jetonte më gjatë. Donte të gjente paqen dhe punoi me ritme që e çuan në nivel të një stresi ekstrem”.
“Timi ynë ishte në kërkim të vazhdueshëm. Shpirti i tij i brishtë artistik ishte në kërkim të përgjigjeve esenciale. Një perfeksionist që ka udhëtuar dhe punuar shumë fort me një ritëm që e ka çuar në një stres ekstrem. Kur mbaroi turin, dëshironte të gjente një ekuilibër në jetë, për të qenë i lumtur dhe të bënte atë që dëshironte më shumë: muzikën. Vuante nga mendimet e tij për domethënien e jetës dhe të lumturisë. Nuk mund të shkonte më tej. Donte të gjente paqen. Tim nuk ishte krijuar për të qenë një makinë; ishte djalosh i ndjeshëm që dashuronte fansat e tij dhe evitonte të ishte në qendër të vëmendjes. Do ta duam gjithnjë dhe jemi të trishtuar sepse na mungon”, shkruhet në komunikatën e publikuar nga CNN.
Deklarata mbyllet me një mesazh dashurie:
“Njeriu që ishe dhe muzika jote meritojnë të mbajmë gjallë kujtimin tënd për gjithnjë. Të duam shumë, familja jote”.
Avicii u gjet i vdekur në Muscat, Oman, ndërsa ende nuk dihen shkaqet e fundit tragjik.
Në deklaratën e parë zyrtare familjarët falënderonin të gjithë fansat për mbështetjen, që i dhanë ndër vite DJ-it të njohur:
“Duam t’ju falënderojmë për mbështetjen dhe fjalët e dashurisë për djalin dhe vëllain tonë. Përulemi përpara të gjithë atyre që e donin muzikën e Tim dhe kanë kujtime të çmuara nga këngët e tij. Ju falënderojmë të gjithëve për inciativat tuaja për të na nderuar”.
Burimi: CNN
