Shqiptarët nuk zgjedhin më divorcin dhe të paktën këtë tregojnë të dhënat e vitit 2017 nga INSTAT, ku ishin rreth 8.300 persona që kërkuan zgjidhje të martesës, nga gati 10 mijë që kishin qenë një vit më parë.
Sipas të dhënave të siguruara nga “Monitor”, në vitin 2016 divorcet ishin në nivelin më alarmant të 25 viteve të fundit, pasi ishin kërkuar 25 divorce në 100 martesa.
Numri i divorceve në 2017-n ishte 4150 apo 18.3 divorce për 100 martesa. Ky është niveli më i ulët që nga viti 2013 dhe rënia e parë në pesë vite.
Arsyet e rënies së numrit të divorceve sipas avokates Margarita Kola lidhet me faktin se shqiptarët nuk zgjedhin më martesën, por bashkëjetesën.
“Ne si juristë po vëmë re një trend që çiftet shqiptare po bashkëjetojnë më tepër, ndaj janë martuar më pak. Kjo mund të lidhet me një rënie të numrit të divorceve vitin e kaluar. Një tjetër arsye është fakti që pjesa më e madhe e çifteve në proces divorci, kanë përfunduar çështjen e tyre, ndaj dhe kjo reflektohet në një numër më të ulët të divorceve në 2017-n. Sa i përket arsyeve të divorcit, ato mbeten të njëjta: arsyet ekonomike, shkollimi dhe emancipimi i femrave, martesat fiktive për dokumentacion, emigracioni, etj”, thotë Kola për “Monitor”.
