Pranë Gjykatës së Apelit në Shkodër janë mbledhur paraditen e sotme me dhjetëra qytetarë të cilët protestojnë për lirimin e 11 kuksianëve që ndodhen pas hekurave pas protestës për Rrugën e Kombit.
11 të arrestuarit pritet që ditën e sotme të dalin para gjykatës ku do të jepet edhe vendimi në lidhje me ta.
Sipas raportimeve të “New24”, janë 150 efektivë policie të cilët ndodhen pranë Gjykatës së Shkodrës ku përfaqësues të opozitës kanë paralajmëruar një tubim.
Protestuesve, mes të cilëve janë edhe familjarët e të arrestuarve, u janë bashkuar edhe deputetë të opozitës, si dhe përfaqësues të Shoqërisë Civile. Ata kanë hedhur tymuese në drejtim të Gjykatës, dhe fishekzjarrë.
Kujtojmë se sipas vendimit që u dha në Gjykatën e Tiranës, por nga gjyqtarë të Kukësit, u lanë në burg: Xhevahir Hereni, Elton Cenku, Florin Onuzi, Shkëlqim Vata, Xhevahir Gashi dhe Elvis Oruçi, Rasim Onuzi, Abdi Haziraj dhe Vasil Laçi, Edmond Matmuja dhe 20 ditë burg për Shpëtim Totën.
Gjykata vendosi detyrim paraqitjeje për Ahmet Toblin, Lulzim Popën, Saimir Trotën, Lefter Rexhmatin, Adem Durakun dhe Armand Ademin, Ardit Alidinin, Zenel Matmujan, Fatos Harullën, Rasim Koloshin dhe arrest shtëpie për: Shaban Selmanin dhe Shemsi Trotën.
