Gati një vit më parë tenori i njohur Kastriot Tusha u gjend në një situatë të sikletshme që e kaloi me shumë sportivitet. Në media qarkulloi një video, ku pas një shfaqjeje operistike, një gazetare e “A1 News” i bëri një intervistë Kastriot Tushës dhe nuk e dinte se cili ishte ai.
-“Përshëndetje! Duam të dimë përshtypjen tuaj për këtë soprano dhe çfarë ju ka nxitur për të marrë pjesë në këtë shfaqje?”-ishte pyetja e gazetares së “A1 News”.
-“Soprano? E keni fjalën për premierën? Shpresojmë që shfaqja të dal me sukses”, u shpreh Kastriot Tusha.
Por gazetarja, e cila nuk kishte asnjë informacion rreth shfaqjes vazhdoi më tej me “gafat” e saj.
-“Ju jeni artist?-e pyeti gazetarja tenorin e njohur.
-“Unë jam Kastriot Tusha, pedagog në Akademinë e Arteve, tenor, dhe me një karrierë artistike të gjatë edhe këtu në TOB”, u përgjigj tenori i njohur teksa ngeli i befasuar nga kjo pyetje.
Pikërisht kjo video u quajt e “turpshme”, “skandaloze” dhe e “patolerueshme” duke qenë se kur interviston një person duhet të kesh informacionin bazë pë atë se çfarë do ta pyesësh.
Kastriot Tusha i ftuar në emisionin “Pasdite në Top Channel”, në kuadër të 35-vjetorit të karrierës së tij artistike e ka kujtuar përsëri këtë moment të sikletshëm.
“Jo të gjithë duhet të më njohin mua, por kur mbulon një fushë të caktuar duhet të jesh e përgatitur. Të tjera përgjigje kisha në tru e të tjera gjëra thashë. Pati reagime të shumta nga ajo video dhe nuk ishte mirë për vajzën”,- deklaroi Tusha.
Pikërisht kjo video ngjalli shumë reagime në mbarë opinionin shqiptar për nivelin e gazetarisë shqiptare.
