Gruaja që hapi zjarr mbi tre persona, para se të vriste veten, në godinën qendrore të “YouTube”, në Kaliforni, është identifikuar si një përdoruese sistematike e faqes, e cila ishte zemëruar me kompaninë për politikat e reja “diktatoriale”.
39-vjeçarja Nasim Aghdam nga Irani qëlloi me pistoletë drejt një burri dhe dy grave, pasditen e së martës.
Aghdam publikonte shpesh video në “YouTube”, ku ishte shprehur kundër politikave të reja të kompanisë dhe i akuzonte për censurimin e videove të saj.
Dëshmitarët thonë se Aghdam mbante syze dhe një shall, kur arriti të hynte në godinën qendrore të “YouTube” dhe hapi zjarr ndaj punonjësve.
Aghdam, e cila ishte një aktiviste e vetë-shpallur për të drejtat e kafshëve dhe një “bodybuilder” vegane, kishte disa profile në “YouTube” dhe disa faqe në mediat sociale.
Në një video që Aghdam publikoi në janar të 2017-s, ajo shpërtheu ndaj medias për censurimin e materialeve të saj. Ajo gjithashtu thoshte se kanali i saj në “YouTube”, që kishte më shumë se 5.000 ndjekës, nisi të kishte më pak shikueshmëri.
Kanalet e saj në “YouTube” dhe faqet e mediave sociale u fshinë vetëm pak orë pas sulmit.
Babai i saj, Ismail Aghdam, tha se kompania nuk e paguante më për videot që ajo postonte. 39-vjeçarja ishte zhdukur prej dy ditësh nga shtëpia, ndërsa ishte gjetur vetëm pak orë para se të kryente atentatin, duke fjetur në makinë.
