Më 23 shkurt u zhduk pa asnjë gjurmë aktorja me origjinë shqiptare që është bërë e njohur me filmin “All or nothing”, Adea Shabani.
Prej dy vjetësh 25-vjeçarja ishte vendosur në Los Angeles duke punuar për të ndjekur ëndrrën hollivudiane. Ajo studionte në Los Angeles për aktrim dhe miqtë e saj filluan të shqetësoheshin kur ajo nuk kishte shkuar më në mësim.
Sipas miqve të saj të ngushtë ata e kishin gjetur të hapur derën e shtëpisë së saj dhe hera e fundit kur u pa ishte më 23 shkurt afër bllokut 1700 në Wilcox Avenue, disa blloqe afër Teatrit të Famshëm Kinez në mes të Hollywood-it, jo shumë larg vendit ku ajo banonte.
Edhe pse ka kaluar më shumë se 1 muaj deri më tani ende nuk dihet asnjë gjë për të. Është e dhimbshme, por tashmë janë shtuar dyshimet se Adea mund të jetë vrarë, ndërkohë edhe i dashuri i saj, Chris Spotz është vetëvrarë pasi po e ndiqte policia.
Thuhet se ai kishte një pasagjer në automjetin e vjedhur, por u ndal dhe la personin të largohej, më pas kishte qëlluar veten në kokë. Autoritetet thanë për “NBC” se automjeti mund të ketë qenë përdorur në një vrasje. Sipas Policisë besohet se Shabani është vrarë në një rajon midis Hollywoodit dhe Sacramentos. Por ende nuk i dihet nëse Adea është gjallë apo ka vdekur, hetimet vazhdojnë.
