Moderatorja e njohur Ilda Bejleri prej disa kohësh është përfolur se është në një lidhje dashurie me deputetin e “PD”-së, Klevis Balliu. Ata ende nuk e kanë konfirmuar lidhjen e tyre, pavarësish se të dy janë ngacmuar publikisht në lidhje me këto thashetheme, por kanë preferuar ta anashkalojnë përgjigjen.
Vetëm pak kohë më parë e ftuar në emisionin “Shiko kush Luan” , Ilda pranoi të vuante një dënim dhe të mos përgjigjej se a kishte një lidhje apo jo me Klevisin. Ndërsa e ftuar në emisionin e pasdites “Rudina”, moderatorja e njohur sportive pranoi se ajo dhe deputeti i njohur janë shumë miq, por nuk konfirmoi asnjë raport me të.
Mbrëmjen e djeshme Ilda ishte e ftuar në emisionin “Top Show Magazine” për të folur për projektin e saj më të ri “Rikthimi i dallëndysheve”. Edhe në këtë emision nuk iu shpëtoi dot ngacmimeve në lidhje me deputetin e PD-së. Ervini si për ta thumbuar e pyeti se me cilën parti ishte ajo.
“Unë jam me Partinë e Punës pra”, tha Ilda që e kapi menjëherë qëllimin pyetjes së Ervinit.
Por ai nuk e la me kaq bisedën, pasi i kujtoi Ildës se në një intervistë të dhënë pak kohë më parë nga Klevisi, ai kishte deklaruar se moderatoret që i pëlqejnë më shumë janë ILda Bejleri, Nevina Shtylla dhe Marina Vjollca.
“Po e ka lexuar diku, por s’ka asnjë gjë të keqe, ku është problemi këtu? I pëlqen futbolli me sa duket…”, tha Ilda si për të mbyllur diskutimin.
Por Ervini si gazetar këmbëngulës që është vazhdoi t’i thoshte Ildës se mbase Klevisi ka parë fotot e saj provokuese në “Instagram”, ndaj e pëlqen.
“Nuk e kuptoj, ku është problemi me Klevisin? Këto foto i kanë parë të gjithë…”, tha Ilda duke mos dashur të zbulojë asnjë gjë në lidhje me thashethemet rreth tyre.
