Nesër në festën e 8 Marsit, për të gjitha gratë dhe vajzat në Tiranë, transporti publik do të jetë falas.
Kështu çdo femër që do të hipë nesër në urbanet e linjave të Tiranës, brenda për brenda kryeqytetit, nuk do të paguajë biletë.
Kryebashkiaku Erion Veliaj tha se, “Kjo është një mënyrë për të kujtuar të gjitha zonjat e zonjushat që vetëm e zbukurojnë këtë qytet dhe mbajnë familjet tona në këmbë”. Kjo iniciativë nisi vitin e kaluar.
Në Shqipëri kjo festë është kthyer në një simbol të veçantë, për nënat dhe vajzat, të cilat në këtë ditë ndihen të privilegjuara. Ato marrin dhurata nga fëmijët apo bashkëshortët, në shenjë mirënjohje dhe respekti.
Kjo ditë shërben jo vetëm për bashkimin e grave pa dallim feje, race, kulture, gjuhe dhe prejardhjeje, por edhe për të kujtuar përpjekjet për barazi, paqe, drejtësi dhe ndërtim në gati 9 dekada.
