Nik Xhelilaj, aktori i njohur shqiptar që po e zhvillon karrierën e tij mes Turqisë e Gjermanisë, ka folur për herë të parë për projektet e tij artistike. Në një intervistë për “RTV 21” ai tregoi se shumë shpejt do të filloj transmetimi i serialit ku Nik do të luaj rolin e një “terroristi” me origjinë nga Kosova.
“Seriali tregon historinë e shkurtër të një vajze turke që jeton në Berlin dhe është në kërkim të nënës së saj që i ka humbur diku në fshatrat e Sirisë dhe njihet në ‘Skype’ me personazhin tim. Unë bëj një karakter që mund të thuash është terrorist, s’është terrorist, është nga këta ushtarët me pagesë, kaçak, ndërkohë sepse sot është një realitet në Siri, është vend i askujt dhe i gjithkujt në të njëjtën kohë.
Personazhi bie në dashuri me këtë vajzën e fton i thotë po të martohesh me mua do të gjej mamanë. Personazhi me fillesë ishte me origjinë arabe, por unë me gjithë regjisorin e kthejmë e bëjmë kosovar…Por do të dalë terrorist i mirë në fund, terroristi me ndjesi të mira”, rrëfeu Niku për rolin e tij në serialin turk.
Gjithashtu aktori i njohur shqiptar zbuloi në këtë intervistë se do të jetë edhe pjesë e një seriali tjetër, por kësaj radhe gjerman, i cili do të fillojë transmetimin në shtator të këtij viti në kanalin “Vox”.
