Nuk janë vetëm të rinjtë shqiptarë që po largohen drejt Gjermanisë për një jetë më të mirë. Pavarësisht se kanë pasur një përmirësim ekonomik edhe të rinjtë nga Italia po bëjnë të njëjtën gjë.
Sipas “Deutsche Welle”, Gjermania mbetet një prej destinacioneve më të dëshiruara prej moshës së re në Itali, në jugun e së cilës gati gjysma e të rinjve janë të papunë, edhe pse të diplomuar.
“Në Itali nuk jemi sistemuar”, thotë një prej tyre, Melania Reca. “Në Spitalin e Romës, ku kreva praktikën bashkë me një miken time, na ofruan një kontratë pune vetëm tremujore, e për këtë duhet ta konsideronim veten me fat”.
Vajza shpjegon më tej se, të njëjtin dokumentacion aplikimi kishte dërguar edhe në Gjermani, nga ku i mbërritën menjëherë tri oferta.
Betejën elektorale përpara zgjedhjeve të 4 marsit, mjaft të rinj italianë e ndjekin pa interes, sepse ndiejnë që nuk janë vlerësuar seriozisht prej politikës.
Sipas Michele Mosca, ekonomist dhe pedagog i Universitetit të Napolit, nepotizmi dhe masat e kursimeve janë vetëm dy prej arsyeve që shtyjnë një numër të madh të rinjsh të largohen nga Italia.
“Ne kemi nevojë për reforma të gjera, kryesisht në sektorin publik. Shumë autoritete dhe zyra janë me poste vakante, e njëkohësisht mënyrat e punës janë penguese, burokratike dhe të vjetruara”, thotë ai.
