Shumë fëmijë të nënave deputete, i kanë shoqëruar në Parlament që në javët e para të lindjes. Mjaftojmë të kujtojmë foton e famshme të realizuar 8 vite më parë, në 2010-n, të deputetes italiane Licia Ronzulli, e cila vendosi që të merrte vogëlushen e saj në radhën e Parlamentit, kur ajo ishte vetëm 6-javëshe.
Raste të tilla janë bërë tashmë të zakonshme në karriget e Parlamentëve të ndryshme në botë. Së fundmi mund të kujtojmë atë të Suedisë dhe Australisë.
Në 15 mars të 2017-s, anëtarja suedeze e Parlamentit Evropian, Jytte Guteland mbajti fëmijën e saj teksa merr pjesë në një seancë të votimit në Parlamentin Evropian në Strasburg, Francë.
Në maj të vitit të kaluar senatorja australiane, Larissa Waters, u bë politikania e parë, që ushqeu fëmijën e saj me gji në një Parlament kombëtar. Zonja Waters, nga partia e Gjelbër e krahut të majtë, ushqeu të bijën e saj 2-muajshe Alia Joy, gjatë një votimi.
Por shumë shpejt nuk do të ishte aspak e çuditshme, nëse do të shikoni politikanet shqiptare, nëna të reja, të cilat do të shoqërohen me të vegjlit e tyre në Parlamentin shqiptar.
Vasilika Hysi propozoi disa rregulla, zbatimi i të cilave pritet të sjellë rinovim në “Kodin e Sjelljes së Deputetëve”. Ndër pesë rregullave të propozuara prej saj ishte edhe një risi:
“Deputetet mund të vijnë në Kuvend me fëmijë të porsalindur pasi do të krijohen hapësira të posaçme që të marrin pjesë nënat bashkë me foshnje”.
Në katër rregullat e tjera të propozuara prej saj ishin: për ndalimin e gjuhës së urrejtjes; ndalimin e votimit të deputetëve në emër të njëri-tjetrit; stafi i Kuvendit të mos përdoret për qëllime partiake; deputeti të mos përfitojë nga imuniteti i tij parlamentar për të shmangur arrestimin.
Ndryshimet e grupit të Partisë Socialiste janë depozituar ditën e djeshme në Kuvend. Ky material i hartuar më parë nga OSBE, u riformulua nga PS dhe pritet të dalë prej disa kohësh.
Burimi: Iconstyle.al
