2018-ta është viti i Ermal Metës! Pas fitores në “Sanremo” me Fabrizio Moro-n, albumi “Non abbiamo armi” i Ermal Metës, i publikuar më 9 shkurt, renditet i pari. Albumi i tretë si solist i këngëtarit, përbëhet nga 12 këngë të papublikuara më parë, të cilat vishen me tinguj e melodi që konfirmojnë talentin e Metës.
Ndërkohë, vijon suksesi i “Non mi avete fatto niente”, hiti fitues i Festivalit italian të Këngës. Kënga renditet në vendin e parë në klasifikimin “Earone”, duke rezultuar si më e transmetuara e javës në radiot italiane. “Non mi avete fatto niente” ishte edhe e para në “iTunes” dhe në Top 50 Italia, gjithashtu hyri dhe në Global Viral të “Spotify”.
Videoklipi i këngës, i cili nuk ka shumë që është hedhur online, është realizuar nga Michele Placido dhe Arnaldo Catinari, që tregon imazhet e mbledhura nga dy autorët përmes frikës së përjetuar edhe në muzikë nga sulmet terroriste të koncerteve në vitet e fundit.
