Nëse ka një dhuratë me të cilën nuk mund të zhgënjesh kurrë për Shën Valentin, është një tufë me trëndafila. Por nëse mendoni se është zgjidhja më e lirë, atëherë gaboheni!
14 Shkurti është një ditë e shënuar, jo vetëm për të dashuruarit, por edhe për dyqanet e luleve.
Joni, tregtar prej vitesh i luleve, ka një dyqan të shitjes me pakicë të luleve në rrugën e Durrësit. Ai tregon për “Monitor” se në 3 vitet e fundit fluksi i punës është rritur ndjeshëm dhe kjo, sepse tek shqiptarët (jo vetëm në Tiranë) po rritet tradita e dhurimit të luleve.
“Trëndafili është lulja më e shitur, njëkohësisht edhe më e shtrenjta”, thotë ai.
Fat për dyqanet e luleve këtë herë është se festa qëlloi në mes të javës. Në rast se do të qëllonte në fundjavë tendenca e njerëzve është për të lëvizur jashtë qytetit.
Për sa i përket çmimeve; ato variojnë në varësi të buxhetit të porositësit. Ato luhaten nga 5 mijë lekë, deri në 100 mijë lekë (afro 1000 dollarë) dhe janë kryesisht burrat që blejnë për bashkëshortet e tyre.
Buqetat gjigande, ku numri trëndafila kapërcen tre shifrat, janë bërë trendi i kohëve të fundit.
Çmimi mesatar i një trëndafili është 200 lekë dhe një buqetë me të paktën 100 trëndafila, kushton mesatarisht deri në 20 mijë lekë. Por, sipas Jonit, nuk mungojnë as porositë me numër të lartë të trëndafilave.
“Një prej klientëve të dyqanit ka porositur një buqetë me plot 500 trëndafila, të cilat përpos të tjerave janë edhe të vështira për t’u transportuar deri në destinacion”, tregon Joni për “Monitor”.
