Aldison Belulaj, 23-vjeçari që qëlloi për vdekje Ariela Muratin dhe plagosi veten, ndërroi jetë ditën e djeshme në spital. Ai është përcjellë sot për në banesën e fundit, ndërsa në lidhje me këtë ngjarje ka folur për “News24” djali i dajës së Aldisonit, Astrit Koroveshi.
Ai tha se 23-vjeçari do të varroset në të njëjtat varreza ku prehet edhe Ariela Murati. Madje ai nuk i trembet as hakmarrjes, pasi Aldisoni ka dashur të martohet me Arielën.
“Ishim pranë spitalit sapo na njoftuan kur ndërroi jetë, pasi i kemi qëndruar pranë këtë javë. Ata do të prehen në të njëjtat varreza. Ne nuk kemi pse trembemi për mundësinë e hakmarrjes se ajo është diçka mes çiftit dhe ishte një lidhje për martesë. Ne na takonte t’i vendosnim kurora me lule vajzës sepse kjo mund t’i ndodhë kujtdo. Mesazhi im është të ketë paqe nga të dyja palët pasi të dy deshën njeri-tjetrin dhe kërkonin të shkonin në martesë, por ndodhi ajo që ndodhi. Ne duam të ketë paqe mes familjeve dhe uroj të mos ndodhin më këto ngjarje”- tha ai.
