Një shok i studentes Ariela Murati, që humbi jetën pasi u qëllua me armë nga Aldison Belulaj, ka zbuluar disa detaje të frikshme sesi e reja përndiqej nga djali prej kohësh.
Miku i të ndjerës ka shkruar për JOQ dhe kërkon që i mazhi i Arielës të mos përdhoset në versione të paqena të publikuara ditët e fundit në media.
Ajo ka folur me të dhe i ka treguar se Aldisoni e përndiqte, madje kishte arritur ta kërcënonte me fotot e të motrës, duke i thënë se nëse shkon në komisariat, motra do ta pësonte. Aldisoni madje ka arritur edhe të ushtrojë dhunë fizike ndaj Arielës, duke e goditur me tullë.
Më poshtë mesazhet që vajza e ndjerë ka shkëmbyer me mikun e saj.
Jeta Osh Qef përshëndetje! Dua te publikoni disa foto te mesazheve te Ariela Muratit me një mikun e saj ne Instagram dhe Whatsapp. Ajo tregon disa detaje me tepër lidhur me Aldosenin. Dua qe ato foto te publikohen, sepse nuk jam aspak dakord me përdhosjen që po i behet imazhit te saj, tani qe ajo ka ndërruar jetë. Dua që disa nga ata qe e hapin gojën përpara kohe, te reflektojnë pak përpara disa fakteve e me pas të flasin. Dua të ruhet anonimati dhe ne foto e kam fshire emrin e shokut te saj kur ajo e ka përmendur.
Mund të provohet shumë lehtë që është profili i saj sepse ne Instagram nuk lejohen dy username te njejte dhe ne Whatsapp biseda është bere me te. Për këtë pjese duhet te me besoni. Do t’ju nis çdo foto bashke me diçka qe dua ta shkruaj unë.
Po. Nga data 15 nëntor e deri para pak ditësh, kur ajo ndërroi numrin dhe me dha numrin e saj te ri. Numër qe nuk e gëzoi. ‘Me përndjek’ me tha. Mesazh i datës 12 nëntor. Nëse policia i do provat, mesazhet janë plotësisht reale si ne Insta dhe ne Whatsapp. Janë te gjitha si te bëra sot.
Ne jemi një shoqëri që lartëson mashkullin dhe ul femrën. Për këtë realitet isha shumë i sigurt, por që kjo ‘traditë’ të zbatohej edhe me të vdekurit, habitem. Habitem se si mund të ngrihen dyshime mbi personalitetin e një vajze fantastike si Ariela.
Ajo ishte shoqja ime më e mirë, motra ime që Zoti nuk ma dha kurrë. Kam qenë i trishtuar dhe i lodhur për t’u përballur me njerëz që edhe pa e njohur, guxonin të flisnin keq për të. Kështu jemi ne, në sherrin e një vajze me një djalë, fajin e ka vajza se ajo i sjell gjërat si t’i dojë qejfi.
Po mashkulli çfarë? A mund të quhet burrë dikush që kërcënon dhe vret një femër? Thanë që e bëri nga dashuria. Jetën ta jep dhe duhet të ta marrë Zoti.
Në vitet e mia të jetës unë kam mësuar se në dashurinë e vërtetë pranohet refuzimi i dikujt dhe nuk kalohet në vrasje. Dikush që të do vërtet, lumturohet edhe duke të të parë të lumtur në krahët e dikujt tjetër.
U tha edhe se ai e mbante me gjithë të mirat dhe shpenzonte për të. Broçkulla të mëdha. Nëse do ishte kështu, pse punonte Ariela ndërkohë që studionte? Pse punonin dhe lodheshin prindërit e saj për t’i siguruar shpenzimet e vitit të ri shkollor? U tha gjithashtu se edhe ajo ‘e ka kruajtur vetë’, përderisa nuk e denoncoi.
Unë, si miku i saj më i ngushtë, e di shumë mirë pse ajo nuk e bëri. Vëllai i Aldosenit mund të thojë që ai nuk e ka kërcënuar kurrë Arielën, por çfarë mund të quhet kjo gjë : Aldoseni kapte foto të motrës së saj rrugëve të Tiranës, ia hidhte në mesazhe Arielës dhe i thoshte ‘Ti shko më denonco, por motrës s’ke për ta parë më të gjallë’. A MUND TË QUHET KY BURRË, KUR BËN GJËRA TË TILLA? A KA VEND TË HIDHET BALTË MBI DINJITETIN E NJË FEMRE QË KA NDËRRUAR JETË, KUR PËRFUNDOI VIKTIMË E NJË MANIAKU?
Juve flisni, sepse këtë dini ta bëni shumë mirë, por mendoni se ndoshta në të ardhmen do të jetë një e afërmja juaj në të njëjtën situatë. Mua më dhemb, më dhemb shumë që ju flisni, që ju gjykoni një vajzë, dita e së cilës ishte e ndarë mes punës dhe shkollës (për rezultatet e larta i ofruan dhe punë në bashkinë e Tiranës, punë të cilën nuk e gëzoi).
Më vjen keq që e gjykoni Arielën pa e njohur, thjesht sepse keni një celular në duar dhe një gojë në fytyrë duhet ta nxjerrin ligësinë e vet vend e pa vend.
Në lidhje me ngjarjen ai shton:
Në një lidhje kanë qenë më parë. Me pas ai e kërcënonte, sepse nuk e pranonte që ajo të vazhdonte jetën e saj qoftë dhe me një person tjetër. E ndiqte, e kërcënonte. Më parë ai nuk e mbante më lekë siç kanë dalë fjalët, sepse ajo punonte vete. Më pas ai e kërcënonte dhe jo siç thuhet nga vëllai i tij që kurrë s’e ka kërcënuar Arielën. Kam pasur dhe një moment te bisedës me Arielën kur ma ka thënë dhe ne Instagram qe ai e kërcënonte me të motrën, se do i vriste të motrën nëse ajo e denonconte, por nuk po e gjej dot. Unë dua qe te gjithë ta mbyllin gojën. S’po i duroj dot këto komente negative. Ju lutem shpërndajini, sepse nuk po ndihem hic mire duke lexuar broçkulla për shoqen time me te mire”.
