Dy ditë pas ngjarjes së rëndë, ku një 23-vjeçar qëlloi për vdekje një studente të Juridikut, pasi ajo e refuzonte, detaje të reja kanë dalë nga të afërmit.
Këtë herë, vëllai i Aldison Belulajt ka folur në lidhje me ngjarjen e rëndë që ndodhi në Tiranë. Vëllai i 23-vjeçarit ka thënë për News24 se Aldisoni dhe Ariela ishin të lidhur. Ai theksoi se prindërit shkuan për t’i kërkuar dorën në shtëpi, ndërsa mohoi se ka pasur konflikt mes tyre.
Pavarësisht këtyre pohimeve, vëllai e pranon se Aldisoni është një tip i mbyllur edhe pse mohoi që Aldisoni të ketë kërcënuar me vrasje Arielën.
Ndërkohë, burime të reja nga Report TV, pohojnë se dyshja kanë qenë të lidhur për 4 vite dhe 21-vjeçarja kishte kërkuar ndarjen para dy muajsh, por kjo nuk është pritur mirë nga i riu, i cili i ka kërkuar të riktheheshin sërish bashkë. 10 ditë para krimit të rëndë, Ariela ndryshon numrin e telefonit.
Mësohet se Aldison Belulaj kishte disa ditë që kërkonte Arielën në Tiranë – ndërsa përballja e së dielës te Universiteti i Mjekësisë, rezultoi fatale për studenten e Drejtësisë e cila pas debatit me 23-vjeçarin, u qëllua nga ky i fundit me plumb në kokë në prani të motrës dhe kushërirës së saj, pavarësisht përgjërimit të saj që të mos e vriste. Pas krimit, Belulaj tentoi vetëvrasjen dhe ndodhet në gjendje kritike për jetën në Spitalin e Traumës.
