Ndonëse e enjtja do të jetë një ditë e kthjellët, temperaturat do të jenë shumë të ulëta gjatë ditëve të fundit të javës duke regjistruar vlera deri në -12 gradë celcius.
Sipas Meteoalb, orët e mbrëmjes dhe të natës mbeten me vranësira dhe reshje shiu e dëbore në zonat malore deri vonë në mbrëmje, kur pritet kthjellim gradual i motit në veri dhe qendër, por zonat jugore – juglindore pritet të kthjellohen pas mesnatës.
Dita e enjte do të jetë e kthjellët, por e ftohtë, ndërsa e premtja sjell sërish vranësira në pjesën më të madhe të vendit dhe reshje shiu e dëbore në veri – verilindje dhe pjesërisht në zonat qendrore.
Rënia e temperaturave fillon sot në mbrëmje duke kulmuar mëngjesin e së enjtes deri në -5 apo -6°C në zonat malore, ndërsa në zonat e ulëta dhe bregdetare shkojnë deri në 0 – 3°C.
Edhe mesdita e së enjtes vijon me rënie të temperaturave duke bërë që maksimumet të zbresin në 11 – 12°C, por deri në 3°C në zonat juglindore. Dita e premte sjell rritje me 3 – 4°C të temperaturave në vend, por sërish një pjesë e zonave malore mbeten gjatë orëve të natës dhe mëngjeseve rreth vlerës 0°C, ndërsa mesdita pritet të shënojë maksimalisht 14°C në jugperëndim të Shqipërisë.
Nga Meteoalb mësohet se gjatë orëve të vona të pasdites reshjet zhvendosen pjesërisht në qendër dhe kryesisht në jug deri orët e para të natës kur moti përmirësohet duke sjellë kthjellime në territor. Dita e enjte sjell dominim të motit të kthjellët, por të ftohtë në gjithë vendin.
