Moderatori i njohur Ledion Liço ishte dje i ftuar në emisionin “Top Show” nga ku foli për programin më të ri muzikor për fëmijë që do të startojë ditën e premte, “The Voice Kids”.
I ngacmuar nga pyetjet pikante të gazetarëve Ledioni foli edhe për jetën e tij private.
Nga fotot e hedhura nëpër rrjetet sociale, Ledioni ka më shumë postime me Londonin, djalin e tij, dhe për disa është krijuar përshtypja se ai kalon më shumë kohë me të. Por nuk qenka e vërtetë pasi mami Sara është ajo që kalon më shumë kohë me Londonin e vogël.
“Të duket ty. Unë e dokumentoj qëndrimin tim me çunin dhe prandaj duket sikur rri unë më shumë. Po ja shiko sa kohë harxhoj unë në punë, gjatë natës ai fle, kështu që mundohem të kompensoj pjesën ku mungoj”, iu përgjigj Ledioni pyetjes së Ervinit.
Një prej kureshtjeve më të mëdha të publikut në lidhje me raportin e tij me Sara Hoxhën, është edhe xhelozia. A është Ledioni xheloz për partneren e tij?
“Po sigurisht që jam. E ke parë Sarën ti apo jo? Sara është alamet ylli. Nëse nuk do të jesh xheloz për Sarën, i bie të jesh budalla…”, tha Ledioni dhe kaq mjaftoi që të gjithë ta shoqëronin me duartrokitje deklaratën e tij të fortë.
Ndërkohë Sara besojmë se ndihet shumë krenare që ka një partner që e befason me deklaratat e tij, por shpresojmë që kjo të jetë një xhelozi e kontrolluar nga ana e Ledionit.
