Personazhet e njohura shqiptare kanë nxituar që ta nisin vitin e ri me pushime e udhëtime në vende të ndryshme. Me fotot që ata postojnë në rrjetet e tyre sociale ne kemi arritur të bëjmë një xhiro anekënd botës . Vende të nxehta me diell, apo ato me borë janë destinacionet më të preferuara të të famshmëve shqiptarë në këto ditë të para të vitit 2018.
Rudina Magjistari këtë fillim viti ka udhëtuar së bashku me familjen larg Shqipërisë për të kaluar pushimet dimërore. Destinasioni i tyre ka qenë një vend malor me dëborë, pikërisht fshati Engelberg në Zvicër. Aty Rudina po tenton të bëjë ski për herë të parë.
“Sot do marrim leksionet e para”, shkruan Magjistari e cila duket se po i shijon më së shumti këto pushime.
Alketa Vejsiu ka nisur pushimet e saj dimërore që para Vitit të Ri në një vend plot diell. Moderatorja ndodhet në Miami të Floridës për të shijuar diellin, detin dhe peizazhin fantastik që ofrohet në këtë zonë. Ndërkohë që në Shqipëri është ftohtë dhe kemi shtrënguar mirë xhupat, Alketa shfaqet me rroba banje duke u relaksuar buzë detit.
Lori, Sara dhe Ledioni kanë zgjedhur Disneyland në California si destinacionin e parë për të kaluar pushimet e tyre dimërore. Një vend i ngrohtë me një atmosferë magjike që të bën për vete.
“Duke e nisur vitin me një buzëqeshje të madhe” shkruan Lori krahas një fotoje ku shihet duke konsumuar churros.
“E nisëm 2018-ën në vendin më të bukur në Tokë”, shkruan Sara krahas fotos që ka postuar në “Instagram”.
Irena Kita së bashku me familjen e saj kanë zgjedhur kompleksin e manastireve Meteora në Greqi për të kaluar pushimet dimërore dhe në të njëjtën kohë për të festuar Vitin e Ri dhe ditëlindjen e saj. Natyra piktoreske dhe historia e veçantë që e shoqëron këtë zonë bën për vete çdo turist.
Këngëtarja e njohur Poni ka vendosur që pushimet dimërore pas festave të fundvitit t’i kalojë në një vend me borë. Edhe pse këngëtarët e muzikës live ju duhet që gjatë festave të fundvitit të jenë në punë, Poni na tregoi se ajo ka gjetur mundësinë për të kaluar kohë me të birin.
Eneda Tarifa ka zgjedhur qytetin e Korçës për të kaluar disa ditë pushimesh së bashku me familjen e saj. Borë, traditë, kulturë dhe mikpritje janë disa nga cilësitë kryesore të këtij qyteti që kohët e fundit është kthyer në një atraksion turistik i lakmuar nga të gjithë.
Marina Vjollca po kalon disa ditë pushimesh në Kosovë. Nga vizita e saj në Kosovë moderatoren simpatike duket se e ka tërhequr shumë një ushqim tradicional kosovar.
“Ushqimi më i mirë në Kosovë-Fli. Bujrum”, shkruan Marina në një foto që ka postuar në “Instagram”.
Këngëtarja Ledina Çelo është dalluar gjithmonë për pushimet e saja luksoze. Kësaj radhe ka zgjedhur një vend tropikal për të kaluar disa ditë pushime së bashku me familjen e saj. Disa foto të postuara në “Instagram”, na çojnë në një vend përrallor që çdokush do të donte të ishte.
Burimi: Iconstyle.al
