Kënga e Fifit “Zhurmë” ishte një nga më të klikuarat dhe të dëgjuarat e spektaklit “Kënga Magjike”. Por nga ana tjetër u përfol edhe performanca e saj live në natën e parë në Pallatin e Kongreseve.
E ftuar tek “Rudina”, Fifi tregoi arsyen përse performanca nuk shkoj ashtu siç ajo dëshironte.
“Kur dola në skenë, por edhe përpara, ndihesha e pasigurt. Kur nisa këngën, isha me sy mbyllur. Kur hap sytë, fiks tek refreni që e kisha aq frikë, shikoj sallën e Pallatit të Kongreseve me drita. Nuk më kishin thënë se njerëzit do të mbanin drita në duar. Aty e humba fare, u meka krejt”, tregoi Fifi, emri i vërtetë i së cilës është Filloreta Raçi.
Në fakt në sallë u krijua një magji e vërtetë me drita që bashkoheshin me dritat që mbanin në duar fëmijët që shoqëronin Fifin në skenë.
Në natën finale gjithçka shkoi ashtu siç këngëtarja e kishte planifikuar. Fifi bëri një përshëndetje më 9 dhjetor për “iconstyle.al”, pak para se të ngjitej në skenë, ndërsa u kërkoi fansave që t’i uronin fat.
