Ajo është prej 4 vitesh deputete në Kuvendin e Shqipërisë dhe angazhimet e saj politikë i ka përdorur veçanërisht në dobi të të drejtave të grave dhe barazisë gjinore.
Ndryshe nga sa mund të duket nga ekrani, Blerina Gjylameti ka treguar se sfidat dhe sakrificat në politikë nuk kanë qenë të pakta.
Ajo është nënë e Joelit 9-vjeçar, i cili kishte vetëm dhjetë ditë që kishte ardhur në jetë kur deputetja nisi angazhimin e saj në politikë. E ftuar në studion e Rudina Magjistarit, deputetja Gjylameti rrëfeu më shumë edhe për jetën private dhe për raportin e fortë që ka me Joelin, djalin e saj të vetëm, i cili ka filluar edhe të kuptojë, nëse prindërit janë politikanë, ata edhe mund të sulmohen, shpeshherë edhe kur nuk e meritojnë.
“Kur e kam pyetur Jolein ‘çfarë do të bëhesh kur të rritesh, më ka thënë deputet. Pasi e pyetja përse, më tha: Sepse ju mund të luani gjatë gjithë kohës në iPad derisa t’ju vijë radha për të folur”, tregon Blerina me të qeshur.
Këtë, i biri e kishte vënë re sa herë që gjyshërit e tij ndiqnin seancat plenare. Por më vonë hoqi dorë nga “profesioni” i deputetit, sepse pa që nëse do të ishte ministër, jo vetëm që mund të luajë në iPad, por edhe nuk e kapin kamerat që po e bën këtë.
Joel, nuk je i vetmi që ke këtë dëshirë!
