Këngëtari Gjergj Jorgaqi, i ftuar në emisionin “Pasdite në Top Channel” është shprehur i i rrituar për degradimin e muzikës shqiptare. Sipas tij botës muzikore shqiptare i mungojnë profesionistët dhe artistët e vërtetë.
“Muzika po degjeneron fare. Po zhduken profesionistët. Nëse deri dje, për të bërë një album na duheshin minimumi 2 muaj, sot e bëjnë brenda disa ditësh duke vjedhur orkestralet në internet”: tha këngëtari.
Gjergji tregoi gjithashtu edhe arsyen se përse ai nuk është më pjesë e skenës shqiptare. Për të muzika shqiptare sot është muzika e femrave të zhveshura.
“Nuk mund të dal të tregoj aftësitë e mia në skenë kur konkurroj me një vajzë që del me mbathje. Kjo është arsyeja që nuk dal më në skenë. Zhgënjimi vjen kur bëhet një kala me faktorë. Unë kam çarë me fuqitë e mia, edhe pse isha mashkull. Femrat e kanë 50% fasadë suksesin dhe e kanë më të lehtë për të çarë”, deklaroi Jorgaqi.
Jorgaqi zbuloi edhe se vajza e tij është larguar nga Shqipëria pikërisht për situatën në të cilën ndodhet industria muzikore në vendin tonë. Ai ka qënë shtysa kryesore që vajza e tij mos të ishte pjesë e botës muzikore .
“Ka ikur nga Shqipëria për shkak të zhgënjimeve. Mentaliteti shqiptar, mënyra si përzgjidhen gjërat. Marrin modele, i bëjnë këngëtare për një muaj dhe i lënë. Ky është prostitucion muzikor. Çdo material e kam bërë për vajzën në 10 vitet e fundit, por vendosi të largohej nga këtu. E hoqa me dëshirë nga muzika dhe vazhdoi për psikologji”.
Gjergj Jorgaqi tha se gjithmonë ka pasur projekte dhe ide, mirëpo do të vendosi t’i vërë në jetë kur gjërat të bëhen në mënyrë profesionale.
