Pasioni i saj për modën është pikasur që në fëmijëri nga babai. Duke parë talentin e vajzës së tij, babai i stilistes Vjollca Llapashtica, e regjistroi të bijën në Universitetin Istituto Marangoni, të Londrës në degën: Fashion design.
Pas përfundimit të studimeve në vitin 2010, Vjollca u kthye në vendin e saj në Kosovë, ku themeloi markën me emrin e saj në Prishtinë. Sot është një stiliste që kujdeset për “look”-un klasik dhe fustanet e vajzave më të njohura të estradës por edhe të Zonjës së Parë të Kosovës, Lumnie Thaçi.
Punimet e saj u paraqiten edhe në VOGUE, ku fustanet e saj u veshën nga modelet me fame botërore si Emina Cunmulaj, Angela Martini, Olivia Culpo (Miss Universe 2012) si dhe aktoret Hollywood-it: Angela Simmons, Darnaa, Liliana Nova e shumë tjera, dhe në shumë festivale ndërkombëtare në nivel botëror, si në Festivalin e Kanës.
Në një intervistë për “Iconstyle.al’, Vjollca tregon sesi është të punosh me Zonjën e kryeministrit dhe personazhet e njohura shqiptare. Ajo zbulon edhe dy raste kur klientet “VIP” kanë qenë “tekanjoze” në kërkesat e tyre dhe disa këshilla për veshjen e femrave shqiptare.
-Cili është projekti që ke në dorë, me çfarë po merret Vjollca këto ditë?
Çdo ditë ndodh diçka e re dhe është sikurse një hapësirë e madhe e nuk parashikon dot se çfarë do të vijë më pas. Për momentin gjëja më e veçantë është dasma e shokut tim. Gjithashtu kam nisur një bashkëpunim me një blogere të re. Po ashtu jam duke kontaktuar nga një dyqan në Teksas të SHBA-ve.
-Ku e merr frymëzimin për dizajnet e tua? Ndonjë idhull nga bota e modës?
Jam një person që vetëm përmes këtij arti di të shprehem apo të flas. Jean Paul Gaultier është personi të cilit i rikthehem çdo herë që ndjehem e lodhur apo e humbur.
-Si është të punosh për personazhe të njohura shqiptare? Ndonjë rast të veçantë kur një personazh i njohur ka bërë “naze” për veshjen?
Të punosh me ta është art më vete. Po përmend dy raste “tekanjoze”, Diana Avdiu në Miss Universe dhe Angela Martini në Festivalin e Kanës.
-Zonja e Parë e Kosovës është një nga klientet tuaja të përhershme. Si është të punosh me Lumnie Thaçin?
Kam kënaqësinë që Zonja e Parë e Shtetit më beson punën mua, ajo ka treguar shumë respekt për artin e modës dhe është shumë konfidente.
-Çfarë duhet të kenë parasysh vajzat kur blejnë një fustan mbrëmjeje ose për raste të veçanta?
Gjithmonë dhe çdo herë të zgjedhin sipas karakterit të tyre jo sipas yjeve të huaja.
-Në cilin shtet ose qytet siguron fitimin më të madh përsa i përket shitjes së dizajneve të tua?
Në trojet shqiptare ka një dallim nga Amerika apo Evropa, pasi atje nuk bëjnë “pazar” për porosinë. Çmimet që caktohen për veshjet e dizajnuara, janë të njëjtë për të gjithë edhe për klientët e Arabisë Saudite.
-A dinë femrat shqiptare të vishen?
Mendoj që femrat shqiptare kujdesen për veten shumë dhe duken shumë bukur.
-Si vishet Vjollca në një ditë normale pune?
Vishem gjithmonë sikur të jetë dita e fundit, nuk di ndryshe, dhe them “Është më mirë të arrij vonë sesa e shëmtuar”. Besoj që çdo femër është më e lumtur kur duket bukur. Madje këto 2 vitet e fundit më është bërë asistente vajza ime Ema, me kritikat dhe komplimentet e saj.
Burimi: Iconstyle.al
