“Dosja Habilaj” është kthyer në temën e ditës dhe duket se të prekur prej saj nuk kanë mbetur vetëm politika dhe drejtësia shqiptare, por edhe fusha e muzikës. Kjo pasi Ylli Baka është përfshirë në këtë dosje në bisedën mes dy të arrestuarve Maridian Sulajt dhe Mariglen Alimuçajt, që janë zbuluar nga përgjimet italiane.
“Në përgjimet ambientale që autoritetet kanë bërë në bordin e një makine të drejtuar nga Maridian Sulaj dhe pasagjer shqiptarin tjetër Mariglen Alimucaj, përmendet edhe emri i Ylli Bakës. Nga përshkrimet që bëjnë autoritetet italiane, në një ndalesë që ka bërë makina, aty kalon Moisi Habilaj me Eltonin.
“Të dy qeshin”, – përshkruhet në dosje.
Më tej ata (Moisiu dhe Eltoni) flasin për Ylli Bakën, që si të tjerët, thuhet në dosje, edhe ai është përdorues droge.
Geni, një prej anëtarëve të bandës që është vënë në përgjim, thotë se të gjithë pinë, por zbulon se Moisiu pi rrallë.
“Maridian thotë se Moisiu e ka kërcënuar në rast se zbulohet që ai ka pirë drogë. Menjëherë më pas, Geni pyet nëse dikush ka kartë për të bërë gati drogën. Të dy kërkojnë në kroskotin e makinës. Makina ndalon (të dy nisin të përgatisin lëndën narkotike)”, përshkruhet në përgjimin e dosjes italiane.
Pas përmendjes së emrit të tij në përgjimet në “Dosjen Habilaj” është zbuluar edhe një foto ku shihet këngëtari Ylli Baka duke drekuar me vëllezërit, Florian Habilaj dhe Moisi Habilaj në Dhërmi.
Pas kësaj ngjarje, Ylli Baka foli për mediat ditën e djeshme:
“I kam fansa, kanë qenë kudo nëpër koncerte. Kam qenë në dasmën e vëllait të vogël të Habilajve, kjo është lidhja e vetme”, ka thënë Baka.
I pyetur se pse e kanë përmendur në atë bisedë dy trafikantët e drogës, sqaron dhe thekson se e gjitha lidhet me muzikën e tij.
“E pëlqejnë muzikën time. Më kanë thirrur nëpër festa, gëzime familjare. Unë kam shkuar siç shkoj kudo”, shprehet Baka paksa i surprizuar, që emri i tij gjendet në dosjen e italianëve.
