Pesë ditë më parë politika ishte në zi, pas ndarjes nga jeta të ish-deputetit Dritan Prifti. Muajt e fundit ai kishte lajmëruar ndjekësit dhe simpatizantët e tij për sëmundjen e rëndë të gjakut, që po kalonte por gjithmonë me mendimin pozitiv se do të arrinte të fitonte betejën.
“Kam bindjen që do ta kaloj dhe këtë siklet shpejt”, shkruhej në postimin e Priftit, të cilin kur e rilexuam disa ditë më parë të gjithë u prekëm.
Pavarësisht bindjeve politike, humbja e një personi publik, e një babai për fëmijët e tij dhe e një bashkëshorti është një ndjenjë e dhimbshme.
Në dy dekada politika shqiptare ka humbur disa nga emrat e njohur të saj, në rrethana të ndryshme, nga “vrasja e shekullit” te aksidentet rrugore apo ajrore:
Dritan Prifti – Tetor 2017
Pak vite më parë ish-ministri fitoi një betejë të rëndë me një sëmundje në kokë, por humbi betejën e dytë që kishte nisur me sëmundjen në gjak më 12 tetor.
Prifti, 49 vjeç, ishte deputet në Kuvendin e Shqipërisë nga viti 2001 deri në vitin 2013, ndërkohë që nga 2009 deri në 2010 mbajti edhe postin e ministrit të Ekonomisë, Tregtisë dhe Energjisë. Ai u shkëput para disa kohësh nga angazhimet zyrtare por asnjëherë nuk hoqi dorë nga politika.
Gjovalin Kadeli – Maj 2017
Deputeti i Lëvizjes Socialiste për Integrim në Lezhë, Gjovalin Kadeli, ndërroi jetë më 26 maj të këtij viti. Burime zyrtare nga LSI thanë se Kadeli ndërroi jetë në një spital në Itali, ku po kurohej për një sëmundje të rëndë që prej datës 30 Mars.
Para kësaj date Kadeli ishte trajtuar në Qendrën Spitalore “Nënë Tereza” në Tiranë, por përkeqësimi i gjendjes detyroi dërgimin e tij në shtetin fqinj Itali, për trajtim më të specializuar.
Kadeli, i cili ndërroi jetë në moshën 53-vjeçare, ishte deputet i Lezhës në Kuvendin e Shqipërisë gjatë dy legjislaturave të fundit.
Teodor Laço – Tetor 2016
Shkrimtari, politikani dhe diplomati Teodor Laço u nda nga jeta më 15 tetor të 2016-s. Teodor Laço lindi më 29 shtator të vitit 1936 në Dardhë të Korçës. Fillimit e tij në letërsi nisin që në vitet ’60. Ai është autor i shumë romaneve, novelave, dramave, komedive, skenarëve të filmave artistikë dhe dokumentarë. Disa prej librave të Teodor Laços janë vlerësuar me çmimet më të larta që jepen në Shqipëri, ndërsa pjesë të rëndësishme të veprës së tij janë përkthyer e botuar edhe në gjuhë të huaja.
Pas viteve ’90 Laço është angazhuar intensivisht edhe në jetën politike të vendit. Për dymbëdhjetë vjet ka qenë deputet në parlamentin shqiptar, ministër i Kulturës në vitet ’94-’97 dhe ka përfaqësuar shtetin shqiptar si ambasador në Federatën Ruse.
Sokol Olldashi – Nëntor 2013
Deputeti i PD, 41 vjeçar, babai i dy fëmijëve dhe 2 herë ministër në qeverisjen e djathë, Sokol Olldashi, humbi jetën mbrëmjen e 20 nëntorit të vitit 2013 nga një aksident tragjik teksa udhëtonte nga Tirana për në Elbasan.
Policia sqaroi se drejtuesi i automjetit, që ishte vetë Olldashi, humbi kontrollin, pasi reshjet e dendura të shiut e penguan të shihte rrugën dhe si pasojë përfundoi në greminë. Mësohet se automjeti ka pësuar disa rrotullime të njëpasnjëshme në greminë duke u shkatërruar tërësisht.
Deputeti i Partisë Demokratike që prej 2001 mbajti dhe dy poste ministrore në qeverisjen e djathtë, atë të ministrit të Brendshëm dhe ministrit të Transporteve.
I ardhur nga gazetaria, Olldashi hyri që herët në politikë, përmes strukturave të PD, për të qënë një ndër zërat më të fuqishëm në këtë parti, një polemist shumë i zoti dhe një zë ndryshe dhe në Partinë Demokratike në të cilën ai u rrit si politikan.
Gëzim Dibra – Gusht 2011
Deputeti i Partisë Demokratike në Qarkun e Shkodrës, Gëzim Dibra u nda nga jeta në moshën 55-vjeçare, si pasojë e një sëmundje të rëndë. Dibra ishte zgjedhur deputet në këtë qark në zgjedhjet e përgjithshme parlamentare të vitit 2009.
Gezim Dibra rrjedh nga një familje me tradita të vjetra në fushën e aktivitetit privat. Ndër biznesmenët e parë në zonën e Shkodrës në fillimet e viteve ’90, dhe me biznesin më të fuqishëm në këtë zonë. Shumë i suksesshëm në krijimin e aktiviteteve private të reja. Gëzim Dibra u zgjodh deputet në legjislaturën e fundit dhe ishte anëtar në Komisionin e Veprimtarisë Prodhuese, Tregtisë dhe Mjedisin.
Sabri Godo – Dhjetor 2011
Shkrimtari dhe politikani Sabri Godo ndërroi jetë më 3 dhjetor të 2011-s. Kryetari i nderit i Partisë Republikane u shtrua me urgjencë më 22 nëntor në reanimacioni e Sanatoriumit, në kryeqytet, si pasojë e komplikacioneve në mushkëri.
82-vjeçari i njohur si plaku i urtë i politikës shqiptare vuante prej disa kohësh nga një sëmundje e rëndë në mushkëri.
Politikani, shkrimtari dhe skenaristi i njohur Sabri Godo ka mbajtur postin e kryetarit Asamblesë Kombëtare të Partisë Republikane të Shqipërisë, e themeluar prej tij në vitin 1991. Godo e ka drejtuar Partinë Republikane për 7 vjet.
Ai ka qenë deputet i Kuvendit të Shqipërisë në dy legjislatura, ku ka ushtruar detyrën e kryetarit të Komisionit të Çështjeve Sociale dhe të atij të Politikës së Jashtme.
Gramoz Pashko – Korrik 2006
Gramoz Pashko lindi më 1955 ne Ersekë, vdiq më 16 korrik 2006, ishte ekonomist dhe politikan shqiptar. Ngjarja e rëndë nisi në Dhërmi, kur Pashko ishte me pushime në Palasë, kur u rrëzua mbi shkëmbinj duke pësuar dëmtime të kokës dhe më pas përfundoi në ujë ku u gjet më vonë pa ndjenja. Për shkak të gjendjes së rëndë kryeministri Berisha urdhëroi transportin e Pashkos për në Itali me helikopterin e Gardës së Republikës.
Por vetëm pak minuta pas nisjes së helikopterit ai humbi kontaktin me radion e kullës së kontrollit ajror të Rinasit dhe u zhduk nga radari. Në momentin e aksidentit në helikopter ndodheshin veç pilotëve dhe mjekut edhe i biri i Pashkos, Rubeni.
Gabimi njerëzor dukej se ishte pista më e mundshme që solli rrëzimin fatal të helikopterit qeveritar “Bell 222” në ujërat e Adriatikut. Trupat e viktimave nuk u gjetën kurrë.
Teodor Keko – Gusht 2002
Teodor Keko (2 shtator 1958 – 22 gusht 2002) ishte shkrimtar, publicist dhe politikan.
Për një periudhë kohe ka qenë pjestar i Parlamentit shqiptar, si përfaqësues i Partisë Demokratike. Ndër kujtimet e tij që vazhdojnë të mbahen mend janë shkrimi “Korrupsioni nuk luftohet nga të korruptuarit” dhe fjalimi i tij në Kuvend ku deklaronte ndarjen përfundimtare me Partinë Demokratike me arsyen “sepse nuk mund të luftoj për demokracinë në një flamur me disa deputetë të tjerë të PD-së që deklarojnë më tepër zi se armiqtë e popullit shqiptar.
Në 20 gusht 2002, u nda nga jeta pas një sëmundje të rëndë në moshën 44-vjeçare. Deri në fund të jetës ai mbeti një antikonformist, një intelektual me kontribut të veçantë në proceset demokratike të vendit dhe një bohem i papërsëritshëm.
Azem Hajdari – Shtator 1998
Më 12 shtator 1998 u vra pabesisht para selisë së Partisë Demokratike nga drejtues të Komisariatit të Policisë të Tropojës, deputeti Azem Hajdari. Por edhe pse kanë kaluar mjaft vite, vrasja e tij mbetet e ende e mistershme me shumë detaje të pazbardhura.
Ngjarja ndodhi përballë selisë së Partisë Demokratike, ndërsa Hajdari doli bashkë me dy truprojat e tij Besim Çera dhe Zenel Neza. Në momentin që Hajdari është ekzekutuar, para selisë së PD-së ishte errësirë, për më tepër edhe kohë e vrenjtur e me shi. Sipas dosjes së akuzës, Hajdari dhe ekzekutorët e tij kanë shkëmbyer disa batuta. Menjëherë pas kësaj atentatorët nxorën automatikët duke qëlluar në drejtim të politikanit dhe truprojave të tij.
Shkrimtari i mirënjohur shqiptar Ismail Kadare e konsideroi vrasjen e Azem Hajdarit si “Vrasja e Shekullit”.
Azem Hajdari u shqua për vetitë e tij, që në fillimin e Lëvizjes Studentore të vitit 1990 për të vazhduar më pas me veprimtarinë e tij politike, duke mbetur në kujtesën historike si një udhëheqës me vlera të rralla demokratike e patriotike, për të cilat atij i është dhënë, pas vdekjes, edhe Urdhri i lartë “Gjergj Kastrioti Skënderbeu” nga Presidenti i Republikës.
*Presim sugjerimet tuaja nëse nuk është përfshirë në këtë artikull një personazh politik.
Burimi: Iconstyle.al/ Ndalohet ribotimi pa lejen e redaksisë
