Menduam se pas bujës që bëri kur mori nusen me tren dhe dëfrimit natën e së dielës, çifti i sapomartuar, Qëndresa dhe Labi, e mbyllën me aq.
Por festa e tyre vijoi edhe mbrëmjen e së hënës me një ceremoni të veçantë të organizuar posaçërisht për shoqërinë.
Çifti dukej shkëlqyer dhe ambienti ishte dekoruar në mënyrë përrallore, që dukej sikur po binte një shi meteorësh në sallë.
Akoma dhe më të veçantë ishin fustanet e nuses, Qëndresa, e cila ndërroi plot tre gjatë dy ditëve të dasmës. Por pse na u duk sikur kishte veshur më shumë?
“2 fustane në 1” është moda e re e fustaneve që nuset shqiptare po ndjekin,. Një metodë e thjeshtë për të mos u ndërruar gjatë darkës dhe për të ndryshuar look. Fustani ka një bisht apo vello të varur në bel që hiqet në një moment të dytë, duke dhënë idenë se është një fustani i ri.
Të njëjtën gjë bëri edhe Xhensila Myrtezaj në dasmën e saj, ku mjaftoi të hiqte bishtin e fustanit për të ndryshuar look dhe për të dhënë idenë e një fustani të dytë.
Por Qëndresa çfarë fustane veshi?
Fustani i parë ishte i veçantë pasi të jepte idenë e një fjongoje gjigante në trup me pjesën e dekoltesë të hapur dhe shpatullat jashtë. Zgjedhja e parë mbetet gjithmonë klasike dhe i tillë ishte dhe fustani prej sateni në ngjyrë të bardhë.
E veçanta e tij qëndronte në pjesën e fjongos, që mund të hiqej për të dhuruar një pamje të dytë të freskët që shfaqte linjat e Qëndresës.
Fustani i dytë ishte tipik me tyl të bardhë dhe pak i fryrë. Nusja dukej më lozonjare me flokët lëshuar.
Fustani i tretë, por jo më pak i rëndësishëm, ishte thjesht përrallor. E njëjta metodë, për të pasur 2 fustane në 1, u përdor edhe këtë herë .
Qëndresa hyri në sallë me fustanin e fryrë klasik dhe përfundoi dasmën me një fustan tip sirene duke hequr vellon që ishte lidhur në bel. Ai ishte i thurur i gjithi me rruaza, ndërsa nusja kishte vendosur një kurorë në flokë për t’u dukur si princeshë.
Burimi: Iconstyle.al
