Hiti botëror dhe kënga më e klikuar në “YouTube” me më shumë se 4 miliardë shikime mund të ketë marrë çdo version cover-i të mundshëm, por askujt nuk i kishte shkuar mendja ta performonte me çifteli.
Instrumentisti Fatmir Makolli është shqiptari i parë, të cili i shkoi në mendje kjo ide.
“Përshëndetje për të gjithë adhuruesit e çiftelisë, përmes kësaj vepre (instrumental) e punuar në versionin shqip çiftelinë do ta njohë e tërë bota, ndërsa ne shqiptarët do të mburremi me të”, ka shkruar Makolli. Videoja e publikuar në “Youtube” ka marrë gati 50 mijë shikime brenda 24 orëve.
Klipi nis me një vajzë të veshur me veshje tradicionale shqiptare që mban një çifteli në dorë dhe vazhdon me instrumentistin që i bie çiftelisë, ndërsa disa çifte balerinësh kërcejnë në sfond, veshur me motive tradicionale shqiptare.
