Ai hyri i vetëm në botën e spektaklit, por u bë edhe më i suksesshëm, kur vëllai i tij binjak u bashkua. Sot Romeo Veshaj ia dedikon këtë sukses punës së përbashkët me vëllain Donald, për të cilin thotë se nuk do të bëhej aq i famshëm sa është bërë sot në Al Pazar.
Dy binjakët e talentuar nga Vlora, që njihen si “Montana dhe Montela”, janë sot dy nga humoristët më të veçantë, që kanë bërë për vete publikun shqiptar me tema aktuale që çdo shqiptar i ndesh përditë. Në një intervistë për “Iconstyle.al”, Romeo shprehet se humori duhet të jetë sa më popullor dhe suksesi, që ata kanë arritur ka ardhur pikërisht se kanë kuptuar gjuhën e shqiptare dhe flasin në emër të tyre.
Romeo sot do të perfeksionojë talentin e tij duke studiuar për Regji Teatri. Ëndrra e tij dhe e vëllait është që të sjellin një turne humoristik që do të nisë nga Vlora dhe do të jetë tipik vlonjat. Por talenti i tyre nuk shtrihet vetëm në aktrim por edhe në fushën e muzikës. Kënga e fundit kushtuar femrave është pritur shumë mirë nga fansat. Për projektet e fundit të dy binjakëve, “ëndrrat në sirtar”, marrëdhëniet me femrat dhe surpriza për fansat mund të lexoni intervistën e mëposhtme:
Me çfarë po merresh aktualisht? Cili është projekti i radhës?
Po pres përgjigjen për Regji Teatri. Jam pak i vonuar në shkollë ngaqë jam përqendruar më shumë në punë, sepse këto vite ka qenë puna prioriteti im. Por tani ka ardhur momenti që të plotësoj veten në këtë drejtim. Më duhet që ta ndjej veten të plotësuar që nesër pasnesër të jem i Zoti edhe në teatër. Është diçka që e dua shumë dhe investoj kohë. Mua aty më flet shpirti, duhet të jesh shumë i verbër që mos ta shohësh e s’besoj se njerëzit janë të verbër.
A ka përplasje në punë, mes një aktori që punon për skenarin dhe autorit të programit Al Pazar? Kemi dhe rastin e largimit të aktores Rudina Dembacaj…
Unë i shkruaj vetë materialet e mia dhe më pëlqen ta shkruaj dhe ta shikoj gjënë ashtu siç dua unë, jo siç duan të tjerët. Në çdo grup pune ka largime dhe afrime, sepse ndryshe nuk funksionon. Sa i përket materialeve, unë kam pasur një ndihmë shumë të madhe nga Goni, pasi me të vërtetë i shkruaj materialet, por është Goni që më plotëson, është ai që më jep ide, është ai që i jep një dorë të ngrohtë në fund. Unë e kam suksesin prej atij njeriu dhe ia dedikoj atij gjithçka që kam arritur sot. Përveçse një njeri shumë profesionist, e kam si një baba të dytë. Më është ndodhur pranë në çdo situatë.
Keni menduar ndonjë rol të ri për sezonin e ardhshëm të Al Pazar?
Ne fillojmë sezonin e ri tani në Al Pazar. Të gjithë më pyesin çfarë personazhi të ri ke, por duhet shumë punë që të sjellësh një personazh të ri. Duhet të jesh i sigurt që do ta pëlqejnë. Duhet ta qepësh shumë mirë një personazh dhe për këtë duhet një kohë e gjatë. Ka dy personazhe të tjera këtë sezon, por mendoj të jenë surprizë sepse mua më pëlqen e papritura pafund. Sigurisht që do të jem me vëllain në bashkëpunim, nuk ndahemi dot.
Keni në plan të bëni edhe një “stand-up” comedy?
Ai është në shkrim e sipër. Është përfunduar, por po flasim me institucionet që do të japin aprovimin dhe me këtë po merremi. Skenari i “stand-up” është i gjithë i shkruar nga ne. Titulli që kemi menduar është “Ore vëlla”, sepse unë jam nga Vlora dhe brenda do të ketë refrene të tipit “Të kam inat”. Do ta vendos veten në situata që mund t’i kenë kaluar të gjithë dhe do të shohin mënyrat sesi i përballoj unë ose vëllai.
A do të ketë histori personale?
Gjeja del më e bukur kur është e jetuar. Nëse një aktor do të bëjë “stand up” shumë të mirë por nuk i ka jetuar në realitet ato që thotë, do të dalë i bukur por fals. Ndërsa kur i ke jetuar, ke atë filmin tënd në mendje dhe atë që ka ndodhur e tregon si për veten tënde. Në “stand up” thuhen gjëra popullore që ndodhin çdo ditë. Njerëzit janë kuriozë të dinë sesi ke vepruar ti dhe unë do e tregoj në një mënyrë për të qeshur që t’ju pëlqejë të gjithëve.
Vlora do të jetë pikënisja e “stand-up”. Unë nga Vlora jam, aty nisi dhe aty mendoj se është vendi ku duhet ta testojmë fillimisht. Nëse ecën mirë do t’i japim gaz pastaj, s’do të na mbajnë më këmbët (qesh).
Nga aktrimi te muzika, e kujt ishte ideja për të bërë një këngë?
Ideja e këngës ishte e të dyve, kishim dëshirë të bënim një gjë të tillë pasi muzikën e kemi hobi, e pëlqejmë shumë, e kërcejmë shumë dhe e këndojmë shumë. Kishim dëshirë ta provonim. Ideja ishte për një këngë të lehtë, punuam për atë projekt por e përmbysëm më pas dhe dolëm me diçka tjetër, ritmike. Titullin e fabulës e nxori Donaldi. Unë i thashë pse të mos bëjmë një “Në të SMS” dhe Donaldi më pas bëri beatbox-in.
Kujt ia dedikoni këngën “Në të SMS”? Mendoni se ka shumë femra të dhëna pas luksit në Shqipëri?
Menduam të përqendroheshim te femrat në përgjithësi. Nuk është dedikim, nuk është personale por besoj se të gjithë çunat e kanë hasur një gocë të tillë. Çdo mashkull në moshën time e ka hasur dhe ndoshta e gjen veten tek kjo këngë. Sa u përket femrave, mendoj se çdonjëra është pak materialiste, për mirë apo keq.
Ka dhe meshkuj që shpenzojnë shumë lekë për femrat dhe e kanë psikologjike. Unë vetë nuk e kam menduar ndonjëherë pjesën që do të marr një makinë të bukur për një femër. Unë mund të marr një makinë të bukur për vete, për ta shijuar me shoqërinë. Më ul komplet pikët mua si mashkull dhe i merr makina (qesh).
Te aktrimi apo muzika, ku e gjen veten më shumë?
Te aktrimi e gjej veten, muzika është diçka plotësuese, që e bëj për qejf jo për ta shitur. Është një burim frymëzimi për mua.. Unë dëgjoj muzikë Trap, është pak e rëndë, por më pëlqen. Zgjohem çdo mëngjes me muzikë që të më ecë dita mbarë. Kënga është frymëzim për mua. Për pjesën e aktrimit, që i vogël kam pasur qejf Jim Carrey dhe mbaj mend që rrija deri në 4-5 të mëngjesit për të ngritur njërën vetull si ai. I kam parë “stand-up”-et e tij, më pëlqejnë shumë. Paçka se në Shqipëri nuk shkon shumë ai lloj humori, sepse publiku shqiptar thotë se është banal.
Po pse e quajnë banale kur përdorin fjalor të tillë në jetën e përditshme. Humori duhet të jetë sa më popullor dhe që të vish te gjuha e popullit, duhet të thuash atë që thua përditë. Ti përditë thua më “çau trapin”, përse duket banale kur e thuan në televizion?
Në cilin rast ju pëlqen të këmbeni rolet? Mund të përmendni një?
Ka ndodhur në plot raste sepse të jesh binjak, ke shumë përfitime. Për shembull mund të lëvizësh me një patentë. Ndonjëherë diskutojmë kur s’kemi kohë të tërheqim para në bankë dhe zëvendësojmë njëri-tjetrin, por problemi është kur firmos, harroj dhe ngatërrohem për emrin,filloj të shkruaj emrin tim. Ka përfitime edhe në provime, unë kam dhënë provimin e anglishtes për Donaldin.
Romeo, çfarë nuk të pëlqen më shumë te fakti që jeni binjakë?
Gjë që nuk më pëlqen, nuk besoj se ka. Tani që kemi bërë emër bashkë, them që s’do ecja nëse nuk do të kisha Donaldin në Al Pazar.
Pika jote e fortë me femrat?
Mendoj se është guximi dhe shikimi. Shikimi është 60 për qind e punës dhe guximi është 20 për qind, 5 për qind mbetet çfarë do flasësh.
Ka ndodhur t’ju pëlqejë një femër në të njëjtën kohë?
Ka ndodhur të na pëlqejë një femër njëkohësisht, por jo me shqiptare, pasi ato e kanë problem. Ka njerëz që i pëlqejnë këto lloj aventurash dhe ndaj ka ndodhur. Megjithatë e lëmë “no coment” këtë pjesë.
Cila është gjëja jo e vërtetë që ke dëgjuar për veten?
Thonë që jam mendjemadh, gjë që unë s’e kam. Mund të nisen nga paraqitja por unë jam njeriu më popullor, që darkave ha te lagja me lypësit. Jam shumë i dhimbsur dhe s’më pëlqen kur e thonë këtë sepse se kam. I urrej njerëzit që janë të tillë sepse jemi të gjithë njerëz, te thjeshtë të barabartë para Zotit dhe para njëri-tjetrit. Çdo qytet ka karakteristikat e veta, por për vlonjatët kështu thonë, edhe pse nuk besoj se është kështu për të gjithë.
Sa rëndësi i kushton pamjes fizike? Kush rri më shumë para pasqyrës?
Unë dhe vëllai kemi luajtur futboll, vëllai ka qenë sulmues, unë portier. Unë kam gjithë jetën që merrem me sport, stërvitje noti, basketboll, sporti është i pandashëm në jetën time. Tani kam 6 muaj që s’bëj vrap edhe e vuaj shumë këtë pjesë. Unë jam i sëmurë për paraqitjen. Mendoj se një njeri që nuk ka edukatë për trupin e vet, nuk ka edukatë për asgjë. Nëse nuk e do veten nuk e do tjetrin, sporti është shumë i rëndësishëm.
Donaldi rri më shumë para pasqyrës se do që të zgjasë flokët tani. Ai vazhdon për “Fashion Design”, është në vit të tretë në akademi dhe është shumë “cool” si njeri. Ka zgjedhur këtë degë sepse stilon shumë bukur, bën gjëra shumë të bukura. Kemi disa projekte që mund t’i kombinojmë bashkë, ai me stilimin unë me pjesën si “show man”, nuk besoj se janë të largëta. Marr këshilla nga Donaldi për veshjen, çfarë më shkon , ashtu siç ai merr për artin skenik nga unë.
A je i fiksuar pas veshjeve markë?
Në përgjithësi nuk jam ndonjë njeri i fiksuar që të vesh një markë. Nëse më rri bukur diçka nuk pyes, e marr sado e lirë apo e shtrenjtë të jetë, markë ose jo.
Je cilësuar gjithmonë si tip më i hedhur se vëllai, ndërsa ai më i qetë. Ka ndonjë rast kur reagoni ndryshe?
Donaldi paçka se luan njeriun e qetë, është shumë i hedhur si djalë. Në shumicën e rasteve merr zjarr shumë shpejt dhe për pjesën e femrave thotë: Mos e ngacmo atë se është e imja. Nëse pëlqen diçka i vë pikën e s’do të pyesë për njeri. Dhe këtë nuk e bën një njeri i qetë (qesh).
Përse ke vendosur ta mbash jetën private larg vëmendjes së mediave?
Sa i përket kësaj pjese, s’dua ta prek fare. Është shumë shpejt që të flas për lidhjet apo femrat. Jam akoma në moshë e dua ta mbaj pak mister këtë pjesë, nuk dua të ma cenojë njeri këtë pjesë. Materiale jap nëpër rrjete sociale, njerëzit ta kuptojnë si të duan.
Nëse partnerja (nëse ke) kërkon që ta bësh publike lidhje, si do të veproje?
Kjo është jeta ime dhe unë bëj ç’të dua. Nëse një femër më thotë pse s’më bën publike, këtu ka një problem. Unë në këtë rast nuk do ta bëja më shumë publike. Edhe çdo gjë do t’ia lë kohës.
Ku e sheh veten pas 5 vjetësh?
Për 5 vjet e shoh veten më të perfeksionuar ndoshta të kem diçka tjetër. I kam lënë letrat e hapura, punën po e bëj dhe asgjë nuk është rastësi. Nuk ka rastësi sot nëse punon. Mund të jetë një përqindje fat por pjesa tjetër është punë, rrugë që zoti të ka thënë duhet ta ndjekësh, po me planet që kemi mendoj se diku do dalim. Sikur 50 për qind e planeve që kemi menduar të realizohen, do të jemi shumë mirë.
Ndonjë surprizë për fansat?
Një këngë të dytë e kemi në projekt po shohim për një bashkëpunim me një këngëtar të njohur grek. Nuk e di sa do ta realizojmë. Na e kanë ofruar pas këngës së parë që bëmë dhe të shohim.
Burimi: Iconstyle.al
