Barcelona është e fundit ndër qytetet evropiane që përjeton efektet e tmerrshme të një sulmi me automjet, në një nga ato që konsiderohet shënjestër e lehtë.
Të paktën 13 vetë humbën jetën dhe dhjetëra të tjerë u lënduan pasi një furgon hyri në zonën e famshme turistike të Barcelonës “Las Ramblas”, duke përplasur kalimtarët e duke ngjallur tmerr dhe panik.
Dëshmitarë të shumtë kanë treguar tmerrin që kanë parë kur furgoni shtoi shpejtësinë dhe po kalonte mbi trupat e njerëzve si të ishte duke ecur në një fushë me misra.
Ishte kaos. Në shëtitore ishin të pranishëm shumë familje me fëmijë. Tom Gueller, i cili jeton afër zonës ku ndodhi sulmi, u detyrua të largohej nga vendi i ngjarjes kur pa furgonin që hynte nëpër turmë.
Ai i tha BBC-së: “Dëgjova britma dhe një përplasje dhe pastaj pashë që turma u nda dhe ky furgon kalonte në mes të “Ramblas” dhe e kuptova se ishte një sulm terrorist apo diçka e tillë. Unë u largova, dua të them se unë jetoj afër, rreth 50 metra më larg. Shkova në banesën time dhe natyrisht po shihja çfarë po ndodhte në rrugë nga ballkoni im”.
I pyetur për furgonin, ai tha: “Nuk po ngadalësonte. Po shkonte drejt në mes të turmave, në mes të ‘Ramblas’”.
Gueller tha se shumë nga dyqanet kishin ulur qepenat dhe policia e armatosur ishte pozicionuar në qoshet e rrugëve, duke vendosur kordonë në rrugë.
Një dëshmitar i quajtur Angel tha se e kishte parë sulmuesin nga afër dhe e përshkroi si një të ri, maksimumi 25 vjeç, me flokë gështenjë dhe të dobët.
Një dëshmitar tjetër, Isaac, ka thënë për mediat lokale se, “Personi po shtonte shpejtësinë. Ai hipi në trotuar dhe po godiste njerëzit. Ne pamë kamionin që po ecte me shpejtësi rreth 80 km/h dhe kalonte mbi njerëz. Lëvizte sikur ishte duke përshkruar një fushë me misra”.
Një shofer taksie tha për TV3 se, “furgoni po ecte zigzag, duke goditur kë të mundte. Ishte shokuese”. Policia raportohet të ketë gjetur një pasaportë spanjolle në furgon.
Një dëshmitare tha për “Sky News”: “Ishte tmerruese. Gjithë ata njerëz u turrën drejt nesh në mënyrë histerike, me fëmijë histerikë… Fillimisht thanë se dikush ishte qëlluar. Papritur një valë e dytë njerëzish zbriti në rrugë dhe ne thjesht vrapuam, në atë rrëmuja humba nga sytë tim shoq. Dyqanet brenda pak sekondash u mbyllën. Ne nuk e kishin idenë se çfarë po ndodhte, por dinim vetëm që duhet të largoheshim prej aty shumë shpejt… kishte qindra njerëz që vraponin për t’u larguar shumë shpejt”.
Një tjetër dëshmitar tha: “Neve thjesht na thanë të vraponim, duhej të kishte qenë goxha afër pasi… ne ishim vetëm një minutë larg nga vendi ku ishin shtypur njerëzit”.
Dy persona janë të arrestuarit në lidhje me ngjarjen, ndërkohë që raportohet se shoferi i furgonit ka mundur të arratiset.
