Keni qenë ndonjëherë kuriozë të dini sesi është jeta e një modeleje shqiptare? Dorina Gegiçi ka rrëfyer për jetën e saj si modele, pagën, dashurinë dhe drejtime të tjera që mund të marrë karriera e saj.
Dhe pyetja një milion dollarëshe: Sa paguhet një modele?
Dorina nuk i bie nga Kina dhe i thotë troç pakënaqësitë e saj në lidhje me tregun e modelingut, pagat dhe mangësitë:
“Unë kam dëgjuar modele që në deklaratat e tyre paguhen mijëra dhe që mbahen me këtë profesion. Atëherë më lejoni të them që nuk është kështu. Në Shqipëri modelingu nuk paguhet shumë, madje ka modele që janë edhe të varfra. Prandaj çështja ndryshon kur ti bën sfilatë jashtë vendit apo paguhesh mirë për sete fotografike. Prandaj nëpër botë modelet janë ndër femrat më të pasura. Ndërsa në Shqipëri nuk vlerësohet sa duhet një modele, sidomos ato profesionistet. Do të shtoja edhe diçka tjetër që funksionon keq këtu, që, si një amatore ashtu edhe një profesioniste paguhen njësoj për një sfilatë”.
Por sa paguhet vetë Dorina?
“Në fakt, varet sesa kohë punon për një projekt, varet se çfarë kërkon ai që të kontakton. Çmimet më të mira janë për sete, sidomos kur flasim për shumë foto. Kompanitë e mëdha paguajnë edhe më tepër për të të pasur imazh të tyrin, duke lidhur një kontratë një ose disavjeçare”.
Dorina nuk e sheh veten në asnjë profesion tjetër veç modeles:
“Kam marrë disa ftesa, megjithatë personalisht nuk më pëlqejnë shumë femrat që tentojnë të bëjnë çdo gjë, edhe pse nuk dinë t’i bëjnë shumë mirë. Siç thashë, mua më duhet akoma kohë që të afirmohem në tregun e modelingut, që të zhdërvjelltësohem në të folur dhe elokuencë, kështu që për momentin nuk është në planet e mia të afërta. Edhe pse duhet thënë që ftesa kam marrë disa”.
Për ta përmbyllur, jeta private e Dorinës është shumë e bukur, e rrethuar me dashuri, po i dashuri i vetëm që ka është “puna e saj”, thotë ajo për Summer Pages.
