Dikur ishin ndër meshkujt seksi më të lakmuar nga femrat dhe nga këngëtaret shqiptare për t’i patur në klipet e tyre.
Ndaj ne ju kthejmë pas në kohë duke i rikujtuar edhe njëherë fillimet e tyre…
Blerim Destani
Soni Malaj e bëri figurë qëndrore në klipin e një kënge të ndjerë siç ishte “Shpirti im binjak” duke i bërë të gjithë të aludonin se mund të ishte shumë më shumë se puna ajo që i bëri bashkë në këtë klip. Skena dushi, aktori i shtrirë në shtrat, ndërsa Soni vishet gjithë sesnsualitet apo puthjet në ballë, janë disa nga çastet që nuk mund të na linin indiferentë. I pyetur për thashethemet që qarkullonin për një lidhje mes tyre, Blerimi komentonte se e kishte pranuar ofertën pasi nuk ishte indiferent ndaj gjërave të bukura dhe se mes tyre ekzistonte thjesht një miqësi shumë e mirë mes dy profesionistëve. Dhe në fakt rezultoi të ishte kështu kurse kënga akoma mbetet si një nga hitet e arta dhe kolona zanore e shumë historive të dashurisë, por shumë e dashur edhe për vetë Sonin.
Robert Berisha
Tani ai është vetë një performues në muzikë por ka patur një kohë kur bënte figurantin në videot e këngëtareve të njohura. Kështu thuajse një dekadë më parë, Robert Berisha dhe vëllai i tij, Patrisi, ishin të përzgjedhurit në videon e këngës “Njëherë po, njëherë jo” të Greta Koçit. Ndërsa e shohim të ndjekë me makinë këngëtaren, kuptojmë se Roberti që tani njihet si “Roberti i Norës” nuk ka ndryshuar shumë në portret. Po ai djali simpatik diferencën me të cilin sot e bën puna me palestrën dhe disa muskuj më shumë si dhe familja e mrekullueshme që ka krijuar.
Alessio Alia
Pas punës si model nëpër kopertina e reklama të ndryshme, të merrte pjesë në një klip ishte thjesht diçka rutinë për të. Dhe zgjodhi ta bënte këtë pikërisht në klipin e një prej mikeshave të tij në showbizz, Çiljetës. Ishte kënga “Falma” ku Alessio i vardisej bukuroshes Çiljetë në një dashuri cigane si ajo e Jennifer Lopez në këngën “Ain’t it funny”. Çadra në natyrë, zjarre të ndezura natën, kërcime latine, tërheqje dhe shumë sensualitet, ishin pjesë e fabulës së klipit që për kohën u pëlqye. I pyetur se sa e kishte paguar Çiljeta për klipin, Alessio tha atëherë se e kishte bërë gratis pasi po i bënte një nder mikeshës së tij. E sigurt është që në 2008-ën kur u publikua kënga, Çiljeta arriti të rrëmbente veç vëmendjes së meshkujve si gjithmonë, edhe atë të femrave falë sex appeal-it të modelit nga Tropoja.
Oni Pustina
Dhe nga një model tek tjetri, ndalemi tek Oni Pustina. Nuk vonoi shumë që fytyrën dhe imazhin e disa reklamave dhe postierin e famshëm të “Ce posta per te”, ta shihnim edhe në klipin e këngës “Nesër shkoj”, prezantuese në Eurovizion 2005. Oni ishte “dhëndrri” i këngëtares, Ledina Çelo, në videon prej 3 minutash ku inskenohej një dasmë tipike shqiptare me gjithë hijeshinë dhe entuziazmin e duhur. Kënga renditet si një ndër përfaqësimet më dinjitoze të Shqipërisë në Festivalin Europian kurse klipi është një atraksion më vete me një model si Oni protagonist.
Burimi: INtv
