“Po, jam pranuar”. Me këto fjalë pa hequr sytë nga monitori i kompjuterit, adoleshenti Mark Zuckerberg komentonte lajmin e pranimit në Harvard, një nga universitetet më prestigjioze amerikane.
Pamjet janë publikuar nga vetë Zuckerberg që e ka shpërndarë videon e xhiruar nga i ati i tij rreth 15 vite më parë.
“Babai im bëri këtë video, kur u pranova në Harvard. Javën e ardhshme do të kthehem për fillimin e studimeve”, shkroi 33-vjeçari në “Facebook”.
Ndryshe nga babai i tij, i emocionuar për lajmin, reagimi i Zuckerberg ishte më i përmbajtur.
Por në fakt Mark nuk u diplomua kurrë: braktisi Harvardin për t’iu dedikuar Facebook-ut që po rritej, që lindi pikërisht nga muret e konviktit studentor. Duke publikuar këtë video Zuckerberg kujton se javën e ardhshme do të kthehet në universitetin e tij të vjetër.
Më 25 maj do të jetë ai, themeluesi i perandorisë sociale, që do të mbajë fjalimin e rëndësishëm në ceremoninë për të diplomuarit. Dhe për këtë rast do të marrë edhe një diplomë nderi.
Dhjetë vjet më parë, i njëjti fat i takoj Bill Gates, bashkëthemeluesit të Microsoft. As babai i Apple, Steve Jobs nuk është diplomuar.
