Pavarësisht pozicionit që mban, kur fiton “statusin e personazhit publik” është e pashmangshme që të flitet për familjen tuja. Ministrja e Arsimit, Lindita Nikolla, është shprehur në emisionin “Këndi i ekselencës”, se ndihet e kompleksuar nga komentet për familjen e saj.
Ajo tregoi si e bija mbërriti deri në Francë, ku studion në master me bursë. Nikolla shprehet se gjithçka e kanë arritur vetë, si ajo, ashtu edhe i shoqi, dhe vinin nga familje të thjeshta. Tani bashkëshorti i ministres është dekan i një universiteti.
“Livia është drita e syve të mi, si për çdo prind. Unë dhe bashkëshorti im ndihemi të plotësuar, pasi vajza jonë i ka përfunduar studimet me rezultate të shkëlqyera. Ajo që na bën ne të ndihemi shumë mirë si prindër, është se gjithçka e kemi arritur me përpjekjet tona.
Ne vijmë nga familje të thjeshta dhe gjithçka e kemi arritur falë angazhimit tonë, edhe vajza jonë përpjekjet e saj i ka përkthyer në rezultate. Ajo nuk i bazon përpjekjet e veta në emra apo mbiemra. Vajza ime nuk pëlqen që unë ta përmend apo të flas në publik për të. Ata që e njohin e dinë sa e tërhequr është.
Vajza përfundoi universitetin në Shqipëri, e më pas (si çdo i ri) kërkoi të bënte masterin jashtë. Kjo ka ndodhur përpara se unë të bëhesha ministre, pra kur fitoi masterin në Barcelonë. Aty studentëve më të mirë iu dha një bursë e plotë për të studiuar në Francë. Jemi kompleksuar nga kjo situatë, edhe për shkak të komenteve”, u shpreh ajo.
Gjithashtu, Lindita Nikolla tregoi si u njoh me bashkëshortin. Ajo kujton se universiteti ka qenë periudha më e mirë e jetës së saj. Asokohe studionte matematikë pranë Fakultetit të Shkencave të Natyrës, dhe ndonëse do të kishte dashur të bëhej mjeke, thotë se këtë fakultet s’do ta ndryshonte me asgjë, sepse aty njohu të shoqin.
