Monika Kryemadhi ka treguar në programin Komiteti të gazetarit Berat Buzhala, që është njohur për herë të parë me Ilir Metën në nëntor të vitit 1991 në zyrën e Musa Ulqinit ku nisën përgatitjet për takimin kombëtar për Forumin Rinor të PS-së. “…dhe që këtej kanë filluar në mënyrë natyrale marrëdhëniet, përplasjet, grindjet, debatet, intrigat politike brenda një forumi rinor, deri sa erdhi një moment që në janar 1994 kurorëzuam puthjen e parë”, tha ajo.
Ndërsa PS-së mund t’i kenë borxh njohjen, siç i tha Buzhala gjatë programit të Gazetës Express, transmetuar në TV Dukagjini, PS-ja u ka borxh vitet më të bukura, “sepse në vend që të bëja dashuri si gjithë shoqet e mia, thërrisja në mitingje lironi Fatos Nanon”, ka thënë Monika.
Megjithatë ata nuk e kanë harruar mbështetjen që kanë pasur në PS dhe Ilir Meta kur mbushi 45 vjeç bëri një darkë të madhe duke ftuar disa anëtarë nga partia e dikurshme, në shenjë falënderimi për suportin e atyre viteve.
Gjithashtu Monika, që edhe sot njihet me mbiemrin e saj, ka treguar që kur e pyetën në gjendjen civile për mbiemrin, u përgjigj Ilir Meta i pari duke ia hequr këtë barrë bashkëshortes së ardhshme, duke shfaqur respekt për natyrën e Monikës, e cila donte të mbante mbiemrin e saj.
