Jemi mësuar të ndajmë çdo gjë mes miqsh. Janë disa gjëra që askujt nuk duhet t’i ngelë hatëri nëse ju i thoni “Jo”. Bëhet fjalë për kujdesje higjene vetjake. Do i bënit një nder të madh vetes dhe shoqes suaj nëse thoni “Jo!”. Ja një listë sendesh që nuk rekomandohen të ndahen bashkarisht:
1. Sapuni
Sapunët e duarve duken sikur pastrohen vetë, por në fakt ndodh krejt e kundërta; janë mbartës të shumë baktereve, pasi asnjëherë nuk thahen plotësisht pas përdorimit. Rekomandohet më tepër sapuni i lëngshëm, pasi redukton përhapjen e baktereve.
2. Furça e dhëmbëve
Absolutisht jo! Për disa, vetëm idea u duket e shëmtuar, por ka shumë çifte që kanë pranuar se e kanë perdorur furçën e dhëmbëve të partnerit. Shumë prej tyre nuk u është dukur aspak johigjenike. Në fakt, furça e dhëmbëve duhet të jetë shumë personale sepse në të kundërt rrezikoni të merrni bakteret e dikujt tjetër.
3. Brisqet
Prekin vetëm sipërfaqën e lëkurës apo jo, atëherë pse duhet të jenë një problem!? Gabim. Lythat janë një shembull për të evituar përdorimin e brisqeve të dikujt tjetër. Janë problematikë edhe nëse nuk keni të çara në lëkurë. Rrezikoheni nga hepatiti B, C dhe HIV.
4. Peshqirat
Një nga gjërat më personale është peshqiri. Mos e ndani atë me askënd. Edhe nëse sapo keni dalë nga dushi, duhet të keni një peshqir vetjak, pasi disa baktere rrinë gjatë në të dhe mund t’i merrni shumë lehtë. Mos harroni t’i ndërroni të paktën një herë në javë.
5. Krehëri/ furçat e flokëve
Krehëri mund të përhapë një sërë sëmundjesh si zgjebja apo edhe parazitë. Nuk duhen ndarë as me pjesëtarët e familjes. Është më e vështirë kur vjen puna për krehërin, pasi në parukeri ju jeni të detyruar të përdorni krehëra të njëjtë bashkë me persona të tjerë. Kërkojini parukieres suaj t’i pastrojë dhe dezinfektojë.
6. Antidjersa
Pse do ta ndanit antidjersën tuaj me dikë!? Në rregull, ndryshon puna nëse është në formë deodoranti. Kujdes, sepse antidjersa e dikujt tjetër, përveçse ju freskon, ju dhuron dhe baktere që nuk do donit t’i kishit.
7. Make up
Është tunduese të përdorësh buzëkuqin e shoqes apo rimelin e saj. Nuk është dhe aq tunduese kur mendon për infeksione sysh, irritim lëkure apo herpes. Përdorni make up-in tuaj dhe kështu do të dukeni të bukura dhe të shëndetshme.
8. Produktet e thonjve
Lima, prerësja… etj janë produkte që duhet të jenë individuale nëse doni të shmangni kërpudhat e thonjve dhe infeksione të tjera.
