Ish-sekretarja e Shtetit dhe ish-zonja e parë, Hillary Clinton, ka deklaruar se nuk ka pasur asnjë informacion mbi aktivitetet kriminale të Jeffrey Epstein dhe bashkëpunëtores së tij, Ghislaine Maxwell, ndërsa po përballet me anëtarët e Komitetit të Mbikëqyrjes së Dhomës së Përfaqësuesve në Chappaqua, Nju Jork.
“Si çdo njeri i ndershëm, jam tmerruar nga ajo që kemi mësuar për krimet e tyre. Është e pakuptueshme që Epstein fillimisht mori një dënim kaq të lehtë në vitin 2008, gjë që i lejoi atij të vazhdonte praktikat e tij grabitqare edhe për një dekadë tjetër,” tha Clinton gjatë dëshmisë së saj.
Clinton i bëri thirrje ligjvënësve që të marrin në pyetje edhe ish-presidentin Donald Trump, duke shtuar se hetimi duhet të zbulojë se “çfarë po fshihet, kush po mbrohet dhe pse po bëhet kjo fshehje?”. Ajo gjithashtu akuzoi kryetarin republikan të komitetit, James Comer, se e ka shënjestruar për arsye politike.
Nga ana e tij, Trump ka mohuar çdo përfshirje në aktivitetet e Epsteinit. Dëshmia e Hillary Clinton u zhvillua këtë të enjte, ndërsa ish-presidenti Bill Clinton, bashkëshorti i saj, pritet të dëshmojë të premten, si pjesë e hetimit të Kongresit që po shqyrton lidhjet dhe përgjegjësitë e të dyshuarve.
Ky zhvillim rikthen fokusin mbi mënyrën se si u trajtuan akuzat ndaj Epsteinit dhe pasojat e tyre për personazhe të njohur publikë, duke theksuar pritshmërinë e madhe që ka Kongresi dhe opinioni publik për transparencë.
