Janë zbardhur detaje të reja nga dëshmia e autorit të vrasjes së gjyqtarit Astrit Kalasë, ngjarje që tronditi opinionin publik. Siç raporton gazetarja e Top Channel, Dorjana Bezat, autori, i cili akuzohet për ekzekutimin e gjyqtarit brenda sallës së Gjykatës së Apelit, ka dhënë shpjegimet e para para hetuesve.
Në deklarimin e tij, ai ka pretenduar se ndaj tij ishte kryer një padrejtësi gjatë procesit gjyqësor.
Sipas pretendimit të xhaxhait të tij, Gjon Shkambit, ai thoshte se kishte fituar në Shkallën e Parë, ndërsa Apeli ia ka kthyer për rigjykim, pasi në dosje i mungonin dy proces-verbale dhe akti i ekspertimit.
Ai pretendon se pala tjetër me dokumente të falsifikuara vazhdon të qëndrojë në ndërtesën e Gjonit.
Prona për të cilën bëhet fjalë është Shkolla e Rezervave në Shkodër, pronësinë e të cilës e pretendon familja Shkambi. Në atë godinë banojnë edhe 31 familje të tjera, të cilat Gjon Shkambi (xhaxhai i autorit të vrasjes së gjyqtarit) kërkonte të nxirreshin jashtë, sepse sipas tij, qëndronin aty pa të drejtë, e kishin zaptuar dhe shfrytëzonin pronën e tij.
Në vitin 1992 31 familjet me vendim të Bashkisë së Shkodrës u vendosën në godinën e ish-Shkollës së Rezervave të ndërtimit. Banorët pretendojnë se prona është ende shtetërore dhe se dokumentet e Gjon Shkambit janë të falsifikuara
Në vitin 2020, 31 familje në lagjen Skënderbeg në Shkodër u përplasën për herë të parë me zyrën private të përmbarimit. Që atëherë, çështja është zvarritur në dyert e institucioneve dhe të drejtësisë. Në atë kohë doli një pronar. Gjon Shkambi pretendoi të ishte pronar i godinës dhe tentoi të futej në godinë. Banorët e akuzuan në atë kohë se ka dokumente false.
Gjyqi për pronën mendohet të ketë qenë edhe shkak i vrasjes së gjyqtarit Astrit Kalaja, ku mbetën të plagosur edhe dy persona të tjerë, babë e bir,të cilët ishin pala tjetër në këtë proces gjyqësor për pronën.
