Ndryshe nga intervistat e tjera, mbrëmjen e sotme ministrja e Arsimit Evis Kushi tha në një intervistë për “Abc News” se është e vetëdijshme për situatën në shkolla, megjithatë nuk ka ndërmend të ndryshojë mënyrë e zhvillimit të mësimit.
Kushi u shpreh se momentalisht gjashtë mësues ndodhen në spital duke u trajtuar, teksa u mjaftua me faktin se çdo ditë ka mësues të infektuar, por ka edhe të shëruar.
“Ne çdo ditë kemi mësues të infektuar por kemi dhe të shëruar. Disa janë me simptoma të lehta, disa janë të vetkarantinuar. Situata është dinamike dhe nuk kemi një shifër të saktë. Ne menjëherë bëjmë zëvendësimin e tyre. Për momentin, 6 mësues të shtruar në spital për shkak të infektimit me Covid,” tha ndër të tjera ministrja.
Kujtojmë se, deri më tani, mësuesit që e kanë humbur betejën me koronavirusin, janë shtatë.
27 korrik- Gazion Rusi 39 vjeç, mësuesi i Medresesë, Shkodër
17 shtator- Nardi Xhemollari, 47 vjeç, mësues në Pogradec
28 tetor- Irena Bajlozi, 61 vjeç, mësuese në Përrenjas
10- nëntor- Gramoz Abedinaj, 60 vjeç, mësues në Roskovec
11 nëntor -Fatmir Sula, shkolla “Bishqem” në Peqin
11 nëntor- një mësuese në Elbasan, e shtruar prej 2 javësh tek Sanatoriumi
12 nëntor- Xhevit Dermyshi, 66 vjeç, mësues matematike në Gramsh
E teksa qeveria e ka marrë shtruar, realiteti vijon të jetë i hidhur dhe koronavirusi të përhapet në shkolla. Ministrja u shpreh sot se kanë gati 3 skenare: I pari është ky që jemi tani, ndërsa i dyti është kryerja e mësimit të alternuar duke u zhvilluar online dhe në shkolla, ndërsa skenari i tretë është zhvillimi i mësimit online.
Denoncime të shumta kanë mbërritur në redaksinë tonë, ku na raportohet se edhe në shkollat më në zë të Tiranës ka mungesë të theksuar të kushteve dhe masave mbrojtëse të pandemisë, siç janë mungesa e dezinfektantëve për duart që supozohet të bëhet çdo mëngjes në hyrje të shkollës.
Rujtja e distancës dhe mbajtja e higjienës, janë dy kushtet bazë për të mos u rrezikuar nga infektimi me Covid-19. Disa drejtues shkollash në shtetet fiqnje si për shembull në Itali, kanë ngritur shqetësimin se në shumë institucione distanca nuk mund të ruhet, sepse nuk ka klasa mjaftueshëm dhe nuk janë siguruar banka një vëndëshe për nxënësit. Për këtë arsye ata kanë kërkuar shtyrjen e hapjes së shkollave deri sa gjithçka të jetë në rregull, ndërsa në vendin tonë duket se kjo gjë nuk i shqetëson aspak drejtuesit.
Zhvillimi ynë nuk mundet kurrsesi të krahasohet me atë të shteteve fqinje, ndaj nuk mund të mendojmë se ne i kemi marrë të gjitha masat për ruajtjen e distancës. Të gjithë e dimë se shkollat në vendin tonë kanë kaluar përtej kapaciteteve dhe për këtë arsye qeveria u detyrua të vendosë që orari mësimor të zhvillohet me 4 turne gjatë kësaj kohe. Për nxënësit që duhet të studiojnë gjatë turnit të fundit me siguri mësimdhënia nuk do të rezultojë aspak efektive, sepse kjo gjë është e vërtetuar edhe shkencërisht se rendimenti bie me kalimin e orëve.
Sakaq, shumica e shkollave në Shqipëri prej kohësh nuk sigurojnë as kushtet më minimale të higjienës, si mungesa e ujit të rrjedhshëm, sapunëve e detergjentëve të tjerë. Autoritetet nuk kanë dhënë asnjë detaj në lidhje me këtë gjë, duke u shprehur vetëm se shkollat që nuk sigurojnë kushtet nuk do të hapen. Sa do të ndodhë kjo gjë pritet ta shohim.
