Pas 30 mjekëve dhe infermierëve që u nisën drejt Italisë për të luftuar COVID-19, një grup tjetër infermierësh, prej 60 personash, është nisur drejt vendit fqinj për të kontribuar në situatën e krijuar ndaj pandemisë.
Stafi mjekësor si fillim do të trajnohet për disa ditë dhe më pas do të vendoset në frontin e parë të luftës.
Lidhur me këtë gjest të Shqipërisë, Ministri i Jashtëm i Italisë, Luigi di Maio ka reaguar nëpërmjet një postimi në Twitter ku shpreh vlerësimet e tij.
“Sot një ekip prej 60 infermierësh do të arrijë në Itali për të ndihmuar në spitalet tona. Një ndihmë konkrete, një tjetër dhuratë që na vjen nga miqtë tanë shqiptarë. Faleminderit Edi Rama për afërsinë dhe mbështetjen e treguar ndaj Italisë. Shihemi në orën 16:30 në Fiumicion. Nuk jemi vetëm,”-shkruan Di Maio.
Ndonëse në Itali situata është drejt përmirësimit, sërish ka nevojë për ndihmë.
Ditën e djeshme numri i viktimave dhe i të infektuarve pati një rënie të ndjeshme, ndërsa numri i të shëruarve pati goxha rritje.
