Era e duhanit brenda ambienteve të shtëpisë është e vështirë për t’u larguar, ndërkohë që ndikon keq edhe në shëndetin tuaj. Ja disa këshilla se si ta largoni erën e duhanit
Uthull ose thëngjill
Thëngjilli dhe uthulla i thithin dhe neutralizojnë erërat e pakëndshme. Në disa enë shtoni pak uthull vere ose copëza të thëngjillit aktiv dhe vendosni në dhomën ku pihet duhani. Nëse keni fëmijë apo kafshë shtëpiake, enët vendosni nëpër vende të sigurta.
Parfumi
Spërkatni pak parfum mbi poçin e ftohtë. Kur të ndizet drita dhe poçi të nxehet, nëpër dhomë do të shpërndahet aromë e këndshme, e cila së paku pjesërisht mbulon tymin e cigareve.
Zbutësi për rroba
Nëse vëreni se aksesorët tuaj, si dorëzat, kapela apo shalli (shamia) kanë thithur erë duhani, por planifikoni t’i përdorni përgjatë ditës së nesërme, leni për një orë në vend të hapur që të ajrosen dhe pastaj përgjatë natës vendosni në qese plastike, bashkë me zbutësin në formë qeseve aromatike për dollapë.
Rëra për macet
Hidhni në tavlla pak rërë aromatike për macet. Rëra largon plotësisht erën e keqe të bishtave të cigares, si dhe më lehtë e pastroni tavllën.
Soda bikarbone
Në mbrëmje para fjetjes shpërndani sodë bikarbone nëpër qilim, mobilie dhe qosheve të dhomës ku është pirë duhan. Në mëngjes pastrojeni me fshesë korenti.
