Prindërit, gjyshërit, komshinjtë, madje dhe një i moshuar që i lirove vendin në autobus të kujton sesa kanë ndryshuar kohërat, nga rinia e tyre te brezi i sotëm. E kuptojmë që kjo gjeneratë nuk krahasohet me asnjë tjetër, ndaj sa herë na kritikoni për diçka e keni përgjigjen: “Epo, atëherë ishin kohë të tjera!”. Jetesa e brezit të prindërve tanë me brezin tonë ka ndryshuar rrënjësisht dhe kjo falë teknologjisë.
Mënyra sesi bëheshin gjërat në të kaluarën duket si e pabesueshme, pasi ka ndryshuar rrënjësisht me mënyrën sesi funksionojnë gjërat sot. Pavarësisht kritikave, të gjithë e pranojmë se disa ndryshime na kanë ndihmuar që të ecim përpara.
Shumë prej tyre na e kanë thjeshtuar kaq shumë jetën, sa nuk mund ta imagjinojmë më pa to. Por nga ana tjetër, prindërit tanë kur ishin të rinj dhe të izoluar nga regjimi komunist nuk do ta imagjinonin se çfarë risish do të kishte në 2018-n.
Ja gjërat të cilat ata nuk i shkonin në mendje se do të ekzistonin:
1.Interneti
“Çfarë është ky?”. Tani ndoshta të gjithë e keni kaluar atë fazën kur duhet t’ia shpjegoje mamit, babit, gjyshes/gjyshit se çfarë ishte kjo gjëja që të sillte gjithë botën në ekranin e kompjuterit. Jo për gjë, por sepse dikur duhet t’ia mbushje mendjen që të ta lidhnin internetin në shtëpi dhe të vendosnin pajisjen e “wireless”-it.
Kuptimin ndoshta ende nuk ia dinë, por dinë se si funksionon. Në rininë e tyre teknologjia e vetme që kishin, ishte televizori, që jepte vetëm me orar edicionin e lajmeve apo ndonjë film.
2.“Smartphone”-ët
“Nokia 3310”. Pothuajse çdo familje kishte një telefon të tillë në mes të viteve 2000. Për të avancuar më pas me celularët “Samsung” apo “iPhone” në 2007-n. Me ekranin me prekje dhe vetëm përmes internetit, të rinjtë e sotëm mund të bëjnë çdo gjë. Ndërsa kthehemi në kohën e rinisë së prindërve tani, takimet apo mbledhjet me shoqërinë bëheshin vetëm përmes telefonit të shtëpisë.
3.Blerjet online
Për prindërit tanë kur ishin të rinj blerjet nuk ishin dhe aq shumë të shpeshta, por nëse donin diçka mënyra e vetme si ta kishin, ishte të shkonin në dyqan me kursimet e mbledhura ndër muaj. Asnjë prej tyre nuk mund ta imagjinonte se pas disa dekadash e vetmja gjë që duhet të kishin për të blerë një veshje apo aksesor, do të ishte të kishin një telefon. Tani të gjithë mund të lundrojnë në faqet e internetit dhe mund të bëjnë “shopping” nga dyqanet më të njohura, jo vetëm në Shqipëri, por nga e gjithë bota.
Madje teknologjia ka evoluar aq shumë, sa mund të porosisësh ushqimin që preferon nga restorantet më të mira vetëm përmes një aplikacioni.
“SnapFood” dhe “Baboon” janë dy nga aplikacionet për porositjen e ushqimeve online, të cilat mund t’i shkarkoni për iOS në App Store (kliko këtu) dhe Android në Play Store (kliko këtu), për të zgjidhur njëherë e mirë problemin tuaj të ditës: “Çfarë të hani?”.
Mjafton të zgjidhni ushqimin tuaj të preferuar, të bëni porosinë dhe do të njoftoheni nga korrieri kur të vijë në punën ose shtëpinë tënde.
4.Pubet
Atëherë nuk ekzistonin klubet e natës dhe askush nuk mund ta përfytyronte se si grupe njerëzisht do të “hallakateshin” në këtë mënyrë. Ndaj nuk është çudi që, prindërit jua kanë thënë me qindra herë të kini kujdes për gjërat që porositni: “Do të hedhin drogë të shishja/gota”. Festat në kohën e rinisë së prindërve tanë organizoheshin në shtëpi, me njerëzit që njiheshin dhe të veshur me të njëjtën kombinim që shkonin edhe në punë.
5.Lidhjet online
“Qyqja!”. Nëse do t’i thuash gjyshes që të dashurin e ke njohur nga telefoni dhe nuk ka ka prezantuar ndonjë kushëri i tretë, atëherë do të merrje këtë reagim. Në vitet ’70-’80 ekzistonte miqësia mes mashkullit dhe femrës, por duhetr të kishte një arsye të fortë që i lidhte këta dy persona. Në shumicën e rasteve martesat janë krijuar përmes shkuesisë dhe ndonjë histori dashurie mund të lindte në ambientet e punës apo në lagje.
