Familja e këngëtarit të mirënjohur shqiptar, Shpat Kasapi, ka njoftuar përmes llogarisë së tij zyrtare në Instagram mbajtjen e ceremonisë përkujtimore të 40 ditëve nga ndarja e tij nga jeta.
Sipas njoftimit zyrtar të publikuar nga familja Kasapi, ceremonia do të mbahet nesër, ditë e Premte (2 Janar 2026), në orën 12:00. Të afërmit, miqtë dhe dashamirët janë ftuar të marrin pjesë në këtë përkujtim, i cili do të zhvillohet pas faljes së Namazit të Xhumasë në Xhaminë e Murat Pashës, e cila ndodhet në Çarshinë e Vjetër të Shkupit.
Në mesazhin prekës të familjes shkruhet:
“Me dhimbje të thellë dhe shumë mall… lusim Zotin e Madhërishëm ta mëshirojë shpirtin e tij dhe të na japë forcë, durim dhe ngushëllim.”
Shpat Kasapi u nda nga jeta më 26 nëntor 2025 në moshën 40-vjeçare. Artisti ndërroi jetë papritur në Itali, ku po qëndronte me bashkëshorten e tij, Selvije Jao, dhe djalin e tyre, Roelin, për trajtime mjekësore të të birit. Shkak i vdekjes u raportua të ketë qenë një atak kardiak fatal.
Lajmi për vdekjen e tij shkaktoi tronditje të madhe në mbarë opinionin publik shqiptar, duke u pasuar nga homazhe të shumta. Trupi i tij u përcoll për në banesën e fundit në vendlindjen e tij, në Tetovë, më 30 nëntor 2025, në një ceremoni ku morën pjesë mijëra qytetarë dhe figura publike.
