Paraditen e sotme kalimi për automjetet ishte i pamundur në rrugën pranë Gjykatës së Tiranës.
Kjo e fundit u “blindua” nga uniformat blu, pasi po mbahet seanca për masën e sigurisë për 23 të arrestuarit në Kukës, që u bënë pjesë e protestës lidhur me tarifën e vendosur për “Rrugën e Kombit”, që degradoi në dhunë.
Për arsye sigurie, masa për 23 të ndaluarit e protestës nuk do të zhvillohet në qytetin e Kukësit, por në Tiranë. Ndërkohë, forca të shumta policie kanë rrethuar mjediset përreth gjykatës në kryeqytet.
Vendimi i beftë i një dite më parë u mor pak orë pasi policia lokale po përgatitej dhe do të kërkonte forca shtesë për sigurimin e rendit në Kukës.
Protesta e 31 marsit nisi në formë paqësore, por përfundoi në përleshje mes policisë dhe protestuesit. Këta të fundit deklaruan se situata degradoi pasi pati provokime nga ana e uniformave blu.
Këta të fundit arrestuan 23 persona, të cilët dyshohet se dëmtuan dhe u vunë flakën sporteleve të pagesës. Prej datës 1 prill, të afërm dhe miq të të ndaluarve protestonin para Drejtorisë së Policisë së Tiranës.
