Një 20-vjeçare nga Koreja e Jugut është dënuar me katër vite burg pasi ka shantazhuar yllin e futbollit, Heung-min Son, gjatë periudhës kur ai luante për Tottenham Hotspur. Sipas raportimeve nga Yonhap News TV, gruaja kishte pasur një lidhje me futbollistin dhe më pas e kishte kërcënuar atë, duke i kërkuar një shumë prej 175 mijë eurosh.
Ajo kishte dërguar edhe një foto të ekografisë së fetusit, duke pretenduar se ishte shtatzënë me fëmijën e tij dhe kërcënuar se do të bëjë publike informacionin, nëse Son nuk i plotësonte kërkesat financiare. Pas kësaj, së bashku me të dashurin e saj, ajo kërkoi një shumë shtesë prej 41 mijë eurosh.
Futbollisti refuzoi të paguante shumën e kërkuar dhe denoncoi ngjarjen në polici. Çifti u arrestua në maj të këtij viti dhe, pas hetimeve, u dënua nga gjykata. I dashuri i gruas, gjithashtu i përfshirë në rast, është dënuar me dy vite burg.
Rasti ka ngjallur interes të madh mediatik, duke u bërë një shembull i shantazhit të figurave publike dhe sportistëve. Gjyqi u zhvillua me dyer të mbyllura, dhe vendimi përfundimtar është shpallur tani, duke treguar një vendim të rëndësishëm për luftën ndaj shantazhit. Ky rast ka nxjerrë në pah rrezikun që mund të përballen edhe personazhet e njohur nga tentativat e tilla të abuzimit financiar.
