Viktima e përdhunimeve masive që ndodhën në vitet 2000 në repartin ushtarak të Bisht Pallës, ka rrëfyer historinë prekëse të jetës dhe pasojat mbi vajzën e saj 12-vjeçare.
Nëna 33-vjeçare ishte e ftuar sot në emisionin e “TV Klan” “Historia ime”, për të ndarë shqetësimin e saj për të bijën, për të cilën dyshon se është abuzuar në jetimore.
Për të gjithë ju që nuk e mbani mend, historia e “viktimës së Bisht Pallës” nisi kur ajo ishte 14 vjeçe dhe u largua nga shtëpia ku e dhunonin.
Pasi u largua nga familja në Vlorë ajo shkoi drejt Durrësit ku i kishin premtuar martesë, por përfundoi në pranga e lidhur, me meshkuj që abuzonin me të për dy muaj rresht.
“Më mashtruan për martesë edhe përfundova në repartin ushtarak. Kam qëndruar dy muaj në repartin ushtarak ku u ushtrua dhunë ndaj meje. Kam qenë e lidhur me pranga gjithë kohës, e abuzuar, një herë në 3 ditë haja një pilaf, dhunë fizike, psikologjike, isha vetëm 14 vjeç”.
Në atë kohë plot 64 njerëz u akuzuan të përfshirë me skandalin e Bisht Pallës, por vetëm 7 vetë u dënuan me burg.
Edhe pasi çështja u la në duart e drejtësisë, 33-vjeçarja ka pasur kërcënime deri në momentin që ka sjellë vajzën në jetë.
Ajo zgjodhi dikë për të bashkëjetuar e për t’iu kthyer jetës normale, por në momentin që partneri mori vesh për shtatzëninë, e braktisi. 33-vjeçarja e mbajti fëmijën pavarësisht se jetonte rrugëve në kushte të vështira. Madje kur e solli në jetë vajzën, mjekët i kishin shuar shpresat se bebi do të jetonte.
Gruaja u detyrua të linte vajzën në një qendër rezidenciale me të drejtë takimi, ku qëndroi deri në moshën 6-vjeçare. Më pas vogëlushja kaloi te shtëpia e fëmijës “Zyber Hallulli” ku qëndroi deri në janar të 2019.
Vajza ishte mjaft e qeshur në takime me nënën e saj, por papritur ndryshoi sjellje kur nisi të jetonte me të:
“Vajza ka qenë shumë mirë, ka qenë fëmijë shumë energjik, e komunikueshme, që e donte jetën, që ëndërronte, deri para dy vjetësh në shtator. Di vetëm që ajo ndryshoi në mënyrë drastike u mbyll në vetvete kuptova vetëm që ajo po vuante”.
Nëna e saj dyshon se ndaj vajzës është ushtruar dhunë dhe jo vetëm. Vajza i rrëfen nënës se e kanë përdhunuar.
“Unë e çova në mirëbesim, dhe e mora nga andej të shkatërruar fizikisht, psikologjikisht, emocionalisht dhe në të gjitha drejtimet”.
Aktualisht çështja është nën hetim!
