Një raport i ri nga IQAir, një kompani zvicerane që monitoron cilësinë globale të ajrit, ka zbuluar se 19 nga 20 qytetet më të ndotura në botë ndodhen në Azi. Shumica e tyre, plot 13 qytete, janë në Indi, ndërsa katër të tjera janë në Pakistan, një në Kinë dhe një në Kazakistan. Jashtë Azisë, në listë përfshihet vetëm kryeqyteti i Çadit, N’Djamena.
Byrnihat, një qytet industrial në veri-lindje të Indisë, rezultoi qyteti më i ndotur në botë me një koncentrim PM2.5 prej 128.2 mikrogramë për metër kub — më shumë se 25 herë mbi standardin e OBSH-së. Kryeqyteti indian, Nju Delhi, u rendit për të gjashtin vit radhazi si kryeqyteti më i ndotur në botë, me një koncentrim PM2.5 prej 91.8 mikrogramë/m³.
Ndotja ekstreme e ajrit po kthehet në një krizë shëndetësore në rajon. Sipas raportit, ekspozimi ndaj PM2.5 shkakton probleme të frymëmarrjes, sëmundje kronike dhe ul jetëgjatësinë mesatarisht me 5.2 vjet.
Ndërkohë, Kina ka treguar një përmirësim të lehtë, duke ulur nivelin mesatar vjetor të PM2.5 nga 32.5 në 31 mikrogramë/m³ falë masave të forta kundër ndotjes dhe investimeve në energjinë e gjelbër.
Raporti thekson se ndotja e ajrit është një nga kërcënimet më të mëdha për shëndetin publik në botë dhe kërkon veprime urgjente për të frenuar pasojat e saj katastrofike.
