Ndër historitë e dashurisë më të bukura konsiderohen edhe këto të personazheve të njohur shqiptarë, që e kanë gjetur atë në skenën ku kanë performuar apo ambientin e përbashkët të punës. Dashuri të tilla janë të shumta, madje të nisura edhe shumë vite më parë.
Helena dhe Ismail Kadare
Në rrugët e Tiranës Helena dhe Ismail Kadare shihen gjithnjë dorë për dore dhe mjaft të dashuruar, gjithmonë në kohën kur ndodhen në Shqipëri. Çifti i shkrimtarëve janë shembull sa i përket ruajtjes së marrëdhënies së fortë mes tyre.
Timo Flloko dhe Vera Grabocka
Një çift mjaft energjik, i suksesshëm secili në profesionin e tij, Timo Flloko dhe Vera Grabocka janë të njohur jo vetëm për dashurinë e tyre, por edhe për arritjet e tyre profesionale. Vera një producente e njohur dhe Timo një nga aktorët më të mirë shqiptar.
Anila dhe Ardit Gjebrea
Ardit Gjebrea dhe bashkëshortja e tij Anila ndajnë të njëjtin ambient pune dhe duket se kjo nuk i ka penguar aspak, që të jenë të dashuruar si në ditën e parë të njohjes së tyre. Ata kanë së bashku dy fëmijë Jonin tashmë të rritur dhe Anën e vogël.
Vendera dhe Lind Islami
Venera Lumani dhe Lind Islami janë njohur gjatë kompeticionit “The Voice of Albania”, ku Venera u shpall fituese. Tashmë ata jetojnë në Tiranë dhe vijojnë të merren me muzikë, si dhe kanë realizuar bashkëpunime me njëri-tjetrin.
Vesa Luma dhe Big Basta
Nuk ishte muzika që i bashkoi çiftin e njohur Big Basta dhe Vesa Luma, por kërcimi! Ata u njohën më mirë me njëri-tjetrin gjatë pjesëmarrjes së tyre në spektaklin “Dancing with the Stars” ku dhe u dashuruan. Para pak kohësh çifti kurorëzoi në martesë dashurinë e tyre dhe tashmë janë prindër të vogëlushit Lian.
Oni Pustina dhe Linda Poda
Oni dhe Linda e gjetën gjithashtu dashurinë për njëri-tjetrin në skenën e “Dancing with the Stars”. Ata e kanë kurorëzuar dashurinë e tyre në martesë dhe tashmë janë prindër të një vogëlusheje.
Enada Hoxha dhe Gerd Vaso
Nisur si një histori “rivalësh” në balet shumë pak mjaftoi për çiftin e balerinëve Enada Hoxha dhe Gerd Vaso, për t’u kthyer në një nga çiftet më të bukur të artit shqiptar. Ata kanë shumë vite të martuar së bashku dhe prej dashurisë së tyre ka ardhur në jetë edhe vogëlushi bukurosh Roan.
Klaudia Pepa dhe Albi Nako
Na është paraqitur si një dashuri mjaft pasionante, ashtu si disiplinat e ndryshme të baletit që ata bëjnë. Klaudia Pepa dhe Albi Nako janë dashuruar në paskuintat e spektakleve të ndryshme dhe tashmë janë të martuar. Ndonëse prej disa kohësh ajo jeton në Itali, ku ka shkollën e saj të baletit dhe Nako vijon me jetën këtu. Megjithatë sërish çifti duket më i dashuruar dhe i afërt se kurrë.
Ami dhe Ermal Mamaqi
Ami dhe Ermali janë dy nga personazhet e njohur shqiptarë, të cilët dashurinë e tyre të lindur në skenën e spektaklit “Portokalli” e kanë kurorëzuar prej vitesh në martesë. “Mesazhi i parë që i kam çuar Amit, për ta ftuar për kafe ka qenë gjatë mbledhjes së Portokalli. Por ajo nuk e kishte nr tim dhe pyeti se kush isha. Jam përballë teje o qorre, iu përgjigja unë”, kështu ka nisur historia e tyre e dashurisë, e cila nisur nga tipi i Ermalit, nuk mund të mungonin batuta të tilla. Pas një sërë programesh të realizuara së bashku dhe biznesit të tyre, tashmë Ami dhe Ermali janë edhe prindër të vogëlushit Joel.
Arbër Arapi dhe Marsida Saraçi
Të dy janë produkt i “Ethet e së premtes” ndonëse në periudha të ndryshme. Aktivitetet e përbashkëta bënë që Arbër Arapi dhe Marsida Saraçi të dashurohen së bashku dhe madje të nisin dhe të këndojnë me njëri-tjetrin. Megjithatë prej kohësh ata nuk kanë performuar më në skenat shqiptare.
Orinda Huta dhe Turjan Hyska
Janë një nga çiftet më të vjetër të shoubizit shqiptar. Këto ditë ata kanë festuar 10-vjetorin e lidhjes së tyre. Në fillim të lidhjes ajo ishte këngëtare e re dhe ai pjesë e grupit “Produkt 28”. Por, përveç dashurisë së tyre ndër vite ata janë rritur edhe profesionalisht, duke patur emisionet e tyre përkatëse. Sa i përket dashurisë së tyre ata do ta kurorëzojnë dashurinë e tyre në korrik të këtij viti në martesë.
Alban Dudushi dhe Bieta Sulo
Çift në jetë por edhe çift në profesion. Prej vitesh tashmë moderatori dhe gazetari Alban Dudushi dhe Bieta Sulo punojnë së bashku në Top Channel. Tashmë për pak kohë ata do të bëhen prindër të një djali.
Eneda Tarifa dhe Erjon Zaloshnja
Çiftin Eneda Tarifa dhe Erjon Zaloshnja padyshim që së bashku i ka lidhur muzika. Ajo këngëtare dhe ai kompozitor, Eneda dhe Erjoni kanë tashmë shumë vite së bashku dhe janë prindër të vogëlushes Aria.
Ilva Tare dhe Eduard Selami
Një politikan dhe një gazetare. Ilva Tare dhe Eduard Selami kanë qenë një nga çiftet e njohura më surprizë. Në historinë e tyre të dashurisë nuk ka vonuar të vijë edhe vogëlushja e tyre Melodi.
Miriam Cani dhe Alban Skënderaj
Të dy këngëtarë, të dy mjaft të njohur dhe të dy shumë të dashuruar me njëri-tjetrin. Alban Skënderaj dhe Miriam Cani janë një nga çiftet më romantike të showbizit. Ata kanë sjellë në jetë vogëlushen e tyre Ameli.
Olta Ahmetaj dhe Fabian Basha
Një balerinë dhe një këngëtar. Prej vitesh tashmë Olta dhe Fabi janë një çift i pandarë, lidhja e të cilëve daton herët që në fillesat e grupit “Produkt 28”, ku Fabi ka qenë vokalist. Fabi dhe Olta tashmë janë prindër të binjakëve Tristan dhe Liam.
Ola Hasani dhe Ezdalin Gorani
Janë një nga çiftet e vjetra të baletit në vendin tonë, të cilët tashmë kanë vite që janë të martuar, pas njohjes së tyre në “Akademinë e Arteve”. Ola dhe Ezdalini kanë qenë të pandarë për shumë vite edhe në punën e tyre në Top Channel.
Besa Kokëdhima dhe Eldi Smaja
Ajo këngëtare dhe ai baterist. Prej shumë vitesh Besa dhe Eldi jetojnë së bashku dashurinë e tyre larg kamerave. Besa nuk ka dashur kurrë të ekspozojë më tepër seç duhet jetën e saj private.
Shpëtim Saraçi dhe Mira Konçi
Një tjetër çift i njohur që dashurinë e tyre e gjetën në skenë dhe sot gëzojnë një martesë të lumtur janë padyshim kompozitori Shpëtim Saraçi dhe këngëtarja Mira Konçi. Gjithashtu ndodhi për shkak të një bashkëpunimi mes tyre për të dhënë shkëndijën e parë të dashurisë mes tyre. Tashmë ata janë prindër të vogëlushëve Drin dhe Era.
Juliana Pasha dhe Altin Llakaj
Që në momentin e parë që ajo ka dëgjuar tingullin e kitares së tij ka mjaftuar që këngëtarja Juliana Pasha të dashurohet me bashkëshortin aktual Altin Llakaj. Prej vitesh tashmë ata janë të lidhur në martesë dhe gjithashtu shpesh bashkëpunojnë edhe në muzikë.
