Behgjet Pacolli është ndalur të ulet me avionin e tij privat në Aeroportin “Adem Jashari” në Prishtinë.
Lajmin e ka bërë publik vetë kryetari i Aleancës Kosova e re, i cili e ka quajtur këtë privim të drejtpërdrejtë nga e drejta e tij për të lëvizur.
“Anulimi i lejes së uljes në aeroportin e Prishtinës për aeroplanin tim është privim i drejtpërdrejtë i së drejtës sime për të lëvizur”, ka shkruar Pacolli.
Ai shprehet ndër të tjera se qeveria e Kurtit në mënyrë diktatoriale po e ndalon të kthehet në Kosovë dhe të ushtrojë veprimtarinë e tij prej politikani.
Pacolli ka dy muaj që është i karantinuar bashkë me fëmijën në Zvicër, ndërsa ka pyetur qeverinë e Kosovës se a do të vepronte njësoj me diplomatët zviceranë apo perëndimorë që duan të shkojnë në Kosovë.
“Kjo qeveri sot në mënyrë primitive, diktatoriale, më privon të kthehem ne vendin tim! Më pengon të zhvilloj veprimtarinë time parlamentare në shërbim të Atdheut tim! Akti ndaj meje, në kundërshtim me gjithë ligjet ndërkombëtare, madje dhe me vendimin e fundit të Gjykatës kushtetuese, nuk është akt force, por akt dobësie”, ka shkruar ndër të tjera Pacolli.
Vota e tij mund të jetë përcaktuese tani që në Kosovë po diskutohet formimi i një koalicioni të ri me Lidhjen Demokratike të Kosovës, për krijimin e një qeverie të re.
/Iconstyle.al
