Plot 18 ditë pas tërmetiti shkatërrimtar të 26 nëntorit, situatat duket ende shumë larg normalizimit për familje të shumta që kanë humbur thuajse gjithçka pas lëkundjeve që lanë pas dëme të paimagjinueshme. Ky është dhe rasti i fshatit Budull, në komunën Bubq, pjesë e rrethit të Krujës.
Me dhjetra shtëpi të fshatit janë të pabanueshme si pasojë e tërmetit dhe familje të shumta u strehuan në çadra në oborret e shtëpive. Por teksa po bëhen thuajse 3 javë që prej tërmetit, banorët e Budullit vijojnë të jenë në çadra në këto ditë të ftohta dhjetori.
Hysen Mullai së bashku me bashkëshorten e tij të sëmurë flenë në çadër në një divan të thyer e në një krevat portativ, ndërkohë që shtëpia e tyre është në prag të shembjes totale.
Gjithçka që ata kanë marrë janë disa ndihma miminale në ushqime, ndërkohë që janë ende në pritje të një zgjidhjeje nga komuna.
Në shtëpinë e Ilir Mukës, i mbetur invalid pas një aksidenti në punë në emigracion, kolonat e shtëpisë ku jeton me nënën dhe babanë janë thyer tërësisht aq sa nuk kuptohet sesi godina vijon të qëndrojë në këmbë.
Edhe ata, si pjesa më e madhe e banorëve të Budullit, vijojnë të qendrojnë në çadëra të cilat janë tërësisht të papërshatshme për periudhën e dimrit.
Me lot në sy dhe ende e tronditur nga ajo që u ka ngjarë, nëna e Ilirit na lutet t’i gjejmë një sistemim të paktën për të birin.
Thuajse në çdo shtëpi të fshatit paraqitet e njëjta situatë.
Kush nuk ka mundur të largohet duke u strehuar tek një i afërm, ka ngritur çadër në oborrin e shtëpisë që veçanërisht për fëmijët e të sëmurët, paraqet rrezikshmëri të madhe.
Në komunë, askush ende nuk u ka dhënë asnjë zgjidhje e madje nuk janë shpërndarë as formularët për përfitimin e bonuseve të qirave apo të një forme tjetër strehimi. Ajo që banorët e Budullit dinë me siguri nga komuna, është se në shtëpinë e tye nuk mund të futen më. Një gjë të tillë na e konfirmon dhe kryetari im komunës, Qemal Daci.
“Deri tani është bërë vetëm verifikimit dhe është bërë një listë me banesat e pabanueshme. Deri në një urdhër të dytë, banorët duhet të qëndrojnë jashtë.”-u shpreh zoti Daci në një takim me iconstyle.al. Por teksa ditët kalojnë e kushtet e motit përkeqsohen gjithnjë e më shumë, banorët vijonë të jenë pa një çati mbi kokë e tërësisht të painformuar se ç’do të bëhet me ta.
