Sistemi arsimor shqiptar është një ndër më të ngarkuarit në Europë, duke përllogaritur 17.1 nxënës për mësues. Megjithatë me kalimin e viteve ky tregues ka ardhur duke u përmirësuar në vendin tonë, por e gjitha për shkak të rënies drastike të numrit të nxënësve në shkolla.
Sipas INSTAT në 2015-tën një mësues jepte mësim për 18.3 nxënës mesatarisht, ndërsa në vitin 2018-të zbriti në 17.4 nxënës për të arritur në 17.1 në 2019-tën. Pritet që në vitet në vijim ky tregues të ulet akoma më shumë, por duhet theksuar se ai nuk është i njëjtë në të gjithë vendin, sepse ka një shpërndarje të pabarabartë të ngarkesës mësimore. Në zonat rurale dhe në bashki të vogla numri i nxënësve për mësues është më i ulët se në qytetet e mëdha dhe sidomos në Tiranë ku ky raport është më shumë se 20 nxënës për mësues.
Raporti ndryshon tek fqinjët tanë grek, ku një mësues jep mësim për 9.2 nxënës mesatarisht. Ngarkesa më e ulët mësimore në Europë paraqitet në Luksemburg me 9.0 nxënës për mësues. Ndërsa ngarkesa më e lartë e trupës arsimore është në Rumani me 19.5 nxënës për mësues dhe më pas vijnë Çekia e Franca me 19.2.
Ndër vite në vendin tonë numri i nxënësve ka ardhur në rënie, e për pasojë edhe e mësuesve. Sipas të dhënave zyrtare nga INSTAT, numri i nxënësve ra në 430 mijë e 700 nxënës në vitin 2018 nga 680 mijë e 600 nxënës që ishin në vitin 1991, ose 35% nxënës më pak.
Gjithashtu nga viti 1991-2018 numri i mësuesve ka rënë nga 437 mijë në 290 mijë. Edhe numri i shkollave u ul me 35% që nga viti 1991. Afërisht, 150 shkolla u mbyllën vetëm këtë vit, për shkak se numri i nxënësve po bie në mënyrë të frikshme në disa qarqe të vendit.
Ministria e Arsimit pohoi se, prej vitit 2009 migrimi i brendshëm i popullatës nga fshatrat dhe qytetet e vogla drejt qendrave më të mëdha urbane, emigracioni dhe rënia e numrit të lindjes kanë bërë që shkollat në zona urbane të kenë më shumë nxënës se sa në ato rurale.
